Noklak nung Ambulance ka tenla agütsü

Noklak, Mongputeni/October 22, 2021 (TYO): Noklak District Hospital atema EKAM ajanga sen lakh 50 alang medical osettsüset aser tachiba mozütem tenla agütsü. Hokolbanü, Item tenla ya Nagaland Civil Secretariat, Kohima nung Medical Minister, Pangnyu Phom-i agizüka liasü, ta sangdong ajanga metetdaktsü.

Kasa anogo, Minister Pangnyu-i Department tenüng nung ambulance ka agizüka liasü. Medical technology tasen keta aliba Ambulance ya Santhi Medical Information Center ajanga tenla agütsü aser Noklak atema Mobile Medical Unit ama iba ambulance amshitsü.

Item tenla tajung atema, Pangnyu-i EKAM aser Santhi Medical Information Center naprongla dang pelaba metetdaktsü.

Iba maparen takok angutsü nükjidong yur State den item NGO sendakteptsüba atema, Pangnyu-isa Joint Secretary Home, Reny Wilfred dang pelaba shisem. Tentet ana ajanga agütsüba Ambulance aser medical osettsüsettem ajak ajangzüktsüsa tim nung amshitsü asoshi pai nüburtem ayongzüka liasü.

Iba sentong nung, Advisor Printing & Stationary, H Haiying, Advisor Economics & Statistics, L Khumo, DC Noklak, Joint Secretary Home aser;  Medical Department aser NGOs anaprongla nungi teshimtet nübutemi jembiogo, ta kasa sangdong nung shia lir.