Non-NDA sorkar arura Opposition nung amentsü: NPP

Shillong, April 29 (Agencies): Centre nung BJP-i aniba National Democratic Alliance (NDA) sorkar tanaben kümtettsü ta Meghalaya NPP president Dr WR Kharlukhi-i ashi.
Centre nung non-NDA sorkar ka kümra NPP-i Opposition bench nung amentsü, kechiyong onoki kechi komala sorkar ka akümtsü’ar memetet, ta Dr Kharlukhi-i ashi.
Taküm LS elections nung BJP-i aniba NDA sorkar tanaben arutsü ta NPP state president-isa ashi.
Chief Minister Conrad K Sangma-i Prime Minister Narendra Modi meina Varanasi-ia aoba atema Dr Kharlukhi-isa ashiba agi “Onok NDA nung shilem ka lir, anungji NDA nung chief minister ajak jaok. Iba ya longjema aliba sayutsü atema liasü.”
Conrad-i Varanasi semdangba atema Congress-i lutsür aser iba atema Dr Kharlukhi-isa “Onok NDA nung teyaritepertem ama ao. Anungji kechiba Congress-i onoki miimbangtsü meranger ta asüba onük jembir?” ta asüngdang.
Osangbenertemi Citizenship Amendment Bill atema asüngdangdang “Northeast lisopurtem anema yangluba ozüng mesüra act ajak anema NPP-i noktaktsü” ta Dr Kharlukhi-i langzü.
“Onoki sayuogo. Onok NDA nung shilem ka lir, saka onoki CAB anema noktak. General Council senden nunga BJP-i CAB tanaben bener arura anema noktaktsü ta onoki lemtetogo” ta paisa shisem.
“2018 nungi Congress-i toktepa aruba elections ajak nung tamakok angur aser tang ya parnok asoshi tatembang elections ama lir” ta NPP state president-isa metetdaktsü.