North California morok mi lendong nung nisung 71 süogo

Paradise, Yimpoksüi/November 17 (Agencies): Rogonü rongtokba jila, kong nisung 1000 dak tema samara bushitepdar, parnok bushitsü atema azü (dog) anir recovery team tem kanga mazüngi inyakdar.
Tang tashi nung Paradise, Sierra tenemtsüng anasa nisung tasümang 71 bo ngutetogo. Iba jila nung nisung 27,000 shi lia liasü aser Yimpoksüi/November 8 aonung morok mi ajanga iba jila kanga mejungi rongogo.
Hopta ka dak tema mi den raraba sülen morokmi abenertemi mi jangrua aliba tesem shilem 45 nungbo morok maotsü atema miyi yangluogo aser tang tashi nung acres 142,000 shibo rongtokogo.
Nisung taküm samaba den iba lendong nung kiojen aika rongtokogo, koba California nung lendong atalokba rongnung tulutiba asütsü. Kiojen rongtokba sülen iba tesem nung alir aika talidak makai kümgogo aser parnok nem talidak ki agütsütsü asoshi tebilemtsü tuluka kümogo.
Iba jila nung ki aser tanga structure tem 12,000 dak tema rongtokogo. Iba lendong agi kongshir alirtem pei kinunger aser medemer kidang jenoker lir aser karbo süki yanglur aser pei gari nung jenoka lir.
Tang tashi nung nisung 1,100 dak tema sentep ki, school aser community centre tem nung emergency shelters 14 yanglur jenokdakja lir, ta American Red Cross otongdar Greta Gustafson-i ashi.
Ketdangsertemi ashiba agi, iba tesem nung nisung 47,000 dak tema dang pei aliba tesem toktsür aotsü asoshi tetuyuba agütsüogo.
Kasa mapang nung tekümzüker parnok 450 dak temai tasümangtem bushidar.