North East Artist Network-i Drop in Centre lapoktsüogo

Dimapur, Metsüremi/March 16, 2020 (TYO): North East Artist Network (NEAN) Dimapur-i Deobarnü (15.03.2020) Drop in Centre (DiC) Alcoholics lapokja liasü. Iba DiC lapoktsüba nüngtem nung NEAN aser Alcoholic Anonymous (AA) den Ao Church Diphupar longjemer Stone Park, NEZCC Dimapur nung AA senden ka ayongzüka agiogo, ta sangdong ajanga metetdaktsü.
Iba sentong nung Alcoholic Anonymous indang office bearer ka mendenti liasü aser AA, President L.Yanger Imsong-i telok pela agizükba o jembi. NEAN achaayanger Toshi Jamir-i NEAN indang nükla aser Drop in Centre inyakyimtem indang metetdakja liasü.
Sentong nung, AA Convenor Taka Jamir-i AA tenzükba, nükjidong, sentong aser Alcoholic Anonymous telok ajanga inyakyimtem achaayangba indang tongmelang agi sentong nung adenertem dang rasa ashi.
Lokti nung yi amshirtem/ajemertem dang tim lenmang sayur maliba aser iba yimya azüoktsü asoshi service tem peria maliba ajanga yilartem rokongba/kangshiba indang Taka-i nemjema bilemtsüba indang ashi; aser
yi ajemba yimya endoka taküm melenshir alitsü asoshi Detoxification Camp ayongzüktsüba atema Ao Church, Dipuphar danga pai pelaba metetdakja liasü.
Iba Detoxification camp (Life Transformation Camp) ya 2018 küm Ao Baptist Church, Diphupar-i mezüng ayongzük, kong yijemer nisung 29-i iba camp nung shilem agia liasü. 2019 küm tanabuba camp agi, kong yijemer 18-i shilem agiogo. Iba camp ajanga yijemer parnok nisung 47 agi yi daoktettsü, kong Arogo-i züngsem 6 choir ama, züngsem 2 steward ama aser züngsem 1 Evangelistic committee züngsem ama shimogo.
Maneni, iba senden nung NEAN ketdangpurtem aser AA telok na tsüngda sensaksema liasü, kong AA züngsemtemi iba telok nung dena inyaka aruba mapang parnoki ajangshibatem den külemi taküm kuli lemsatepa liasü. Iba sentong sarasadema tembang.