North East Christian University indang ki meshitet

Dimapur, Mongputeni/Oct. 08 (TYO): North East Christian University (NECU) ajanga October 7, 2019 anogo NECU City Campus nung Anchor Building indang 1st Floor West Wing aser tetsürtem indang hostel ka semzükba sentong ka agia liasü. Iba ki ana ya International Ministries nung Executive Director Rev. Sharon Koh aser Rev. Dr. Joseph Huse, Friends of NECU nungertemi item ki bendanga agüja semzüktsü. Iba sentong nung Rev. Koh meina International Ministries nungi züngsem pezü aru aser Friend of NECU aser American Baptist Churches nungi telok ka Rev. Katie-i anir arua liasü. Iba den külemi International Ministries indang country co-ordinator, Rev. Katie Longkumer-a arua dena liasü.
Iba ki ana bendanga agütsüba sülen Anchor Complex, Burma Camp East Block, Dimapur nung aliba NECU indang City Campus nung terenlok balala aliba sayutsü mechi NECU den külemi inyaker den Seminar Hall tasenba nung sentong tajung ka agi.
Ki meshitetba sentong lapoka Asia Pacific Baptist Federation undang taoba General Secretary, Rev. Bonny Resu-i sarasadem. Vice Chancellor Prof. Darlando Khathing-i NECU indang tongmelang agi iba sentong nung rasaa ashi aser Director of operations Mr. Huzo Meru ajanga NECU senotsü osang agütsü. NECU indang Governing Council züngsemtem tenüng nung Alemtemshi Jamir (IAS) aser NBCC General Secretary Rev. Zelhou Keyho nati o jembia liasü.
Bendanglen nungi arurtemia iba sentong nung o jembia liasü aser NECU kaketshir aser Oriental Theological Seminary nungi züngsem kari temeja ken aten.