North East Councils budget crore 1 agi ajemtsü

Shillong, February 13 (Agencies): 2016-17 atema Budget crore 1,000 aliba nungi crore 1 ajemtsüba atema jembishinütsü asoshi North East nung district council 10 nungi tekolaktem Brehostibarnü Shillong nung ajuruteptsü.
District council-i 2015-16 atema sen crore 1,000 agütsüba amshiba küli tejangja magütsüba ajanga, tawa budget senden nung crore 1 ajemtsü. Maneni 2017-18 atema budget crore 500 lemzüktsüogo.
Budget dak sentakba ken o jembishinütsü asoshi, Northeast nung district council 10 prongla nungi rongdak senden ka akatsü asoshi jatepogo, ta Deobarnü KHADC Chief Executive Member P.N Syiem-i ashi.
Syiem-i ashiba agi, Council atema 2017-18 asoshi Centre-i budget nung crore 500 lemzüktsübaji crore1,000-i ajungkettsüla.
Budget nung sen crore 1 ajemtsüba, aser 2017-18 Council ajak atema crore 500 lemzüktsüba ken o ajak longjemer Centre den jembishinütsü nüngdaka lir, ta Syiem, shiba FOCUSS nung tekolakba lir, paisa ashi.
Sen amshiba kuli menor agütsübaji NITI Aayog-i guideline menor renemba ajanga lir. Aji dang masü KHADC-i mapa teinyaktsütem telemtetba mezülongi agiba aser State sorkartemi fund menor yokba ajanga lir, ta paisa shisem.
Sixth Schedule nung aliba ama item tesemtem ajungkettsü asoshi Centre-i budget lemzüktsüba nung parnok telemtetba tanaben reprangshi nung ajungtsü. Iba senden amenba sülen budget dak sentakba nung Centre dangi ajak longjemer telemtetba shidi ka yoktsü, ta paisa metetdaktsü.