North East Executive Council-i sangdonger

Dimapur, Rongchii/April 20 (TYO): Uttar Pradesh Chief Minister-i tashi sayua Rajasthan kübok Kota tesem nungi kaketshirtm aika meyipa anir aruba ajanga linük ajunga mokdanger aliba inyakyim amajok kümdaktsüogo. Iba ajanga tao dak makai aliba kaketshirtem, aayangertem aser tanga mapa balala nung inyakertem arakzü tenzükogo shirnok state balala nung sabanger lir aser tang pei state-i meyipa aotsü asoshi timla agütsür.
Kota nungi Uttar Pradesh-i ozüng alema nüburtem anir aruba nung Lok Sabha speaker aser MP dena temaba jenjang nung aliba yimden yimsüsürtem aika densema lir ta angazüker. Iba ajanga state sorkar tem nem timtem agütsür aser Yogi Adityanath-i inyakba ama tasü tait jenjang agitsü akhanger. Iba jenjang agiba ajanga lokti nung tashidak prokshia yokra iba ken o nung densema aliba ketdangsertem aitsütsüla, kechiyong tanga state temia iba amala jenjang agitsüsa akümtsü. Koba state-isa iba jenjang magitetlir parnok nüburtemi aitsütsü koba yimden yimsüsüba tsütsü meyiper arutsü aser iba ajanga voter temi tamang makateti akümtsü. Centre sorkari tangsa tang jenjang tapet agitsüla aser linük mokdanga aliba anema inyakba nung densema alirtem ajak aitsütsüla. Atok Kilonseri iba ken o nung ajem ajema melei tasü tait jenjang ka agitsüla, ajita mesera linük tia mejungi lir.
Iba ken o dak sendakba nung North East Executive Council of Janata Dal United (NEEC, JDU)-i Ato Kilonser aser Home Minister dang linük mokdanger aliba mpang Kota nungi kaketshirtem pei ki bushia aoba ken o yimjak nung jangjashitsütsüla aser UP CM-i jenjang agiba ya Centre sorkari jangja ali mali mesera temelaba agi magi ajia jangjashitsütsüla. Kasa mapang nung North East state sorkartema state balala nung prokshia aliba kaketshirtem, mapa balala nungi inyakertem aser tanga lisopurtem, Kota nungi kaketshirtem anir aruba ama anir arutsü asoshi renema alitsüla, ta NEEC, JDU mendenbuba Senchumo Lotha Nsn-i sangdong ka ajanga metetdaktsü.