North East Industrial corridor atema senden amen

Kohima, Chiteni/July 11 (TYO): North East Industrial corridor atema ADB-i asadangba dak sendakba nung Brihostibarnü Chief Secretary, Temjen Toy aser tongti ketdangsertem den senden ka menogo, ta ketdangsertem osang ka ajanga metetdaktsü.
Senden nung ADB team nungi züngsemtemi, ADB-i North East Region nung inyakbatem rongnung tongti sectors asem- Transport, Urban aser Energy indang metetdaktsü.
Transport dak sendakba nung ADB-i benoka aliba SASEC Road Transport Corridor Projects indang metetdaktsü; US sen million 140 indang projects rongnung Kohima- Kidima- Karong- Imphal section densema lir.
Urban Sector tsütsü ADB-i US sen million 200 indang North East Region Capital Cities Development Investment program metetdaktsü; iba ya ajanga North East State tem kübok Agartala, Aizawl, Gangtok, Kohima aser Shillong yimtitem nung aliba nüburtem jenjang ajungkettsütsü.
ADB team-isa India, Myanmar, Burma aser Nepal nung inyaktsü aliba project balala indang osang metetdaktsü.
IDAN CEO, Alemtemshi Jamir-i, shishilembaba jenjang ajungkettsütsü atema shisaliok rejutem nung rangloker inyaktsü aser state nung tzü onük nunga rangloker inyaktsü nüngdak, ta metetdaktsü.
Paisa, arrtsülen shishilembaba tsütsü shishilembaba maparen ajak Moreh- Imphal sector area nung inyaker, ta shia ADB ajanga Avangkhu ama northern trade centres lapoktsü atema mepishia metetdaktsü.
Senden nungsa GPS ajanga asalentongba melenbo Myanmar aser India napronglai longjemer telemtetbatem agia inyaktsü atema o lemtep. Senden nungsa, shishilembaba lenmang lapoktsü atema arrtsülen hospitals aser shisaliok rejutem amenoktsü atema o lemtep.
Chief Secretary-i, ADB team-i asadanga project report renemtsü aser North East Industrial corridor-a ketdangsüa inyaktsü, ta metetdaktsü. Paisa Eastern Expressway ajanga border trading points karbosa sendakteptsü nüngdak, ta ashi.
Facilities maliba ajanga shishilemaba meinyakteter, ta shia pai, state nung aluyimba tsütsü Coffee tsünütsüba kanga tongtibang aser raw material peria lir anungji paper mill asentenshitsüsa tashi lir, ta ashi.
Chief Secretary-isa mini power plant ka amenoktsü koka lir, ta ashiba den külemi smart city atema senotsü nung state shilem indanga metetdakja liasü.