North East nung gari lenmang yanglutsü atema sen lakh crore 1 agütsütsü

New Delhi, March 23 (TYO) : Centre-i taruba küm pungu tsüngda North East nung gari lenmang mapatongtem atema sen lakh crore ka agütsütsü, ta Union Minister Nitin Gadkari-i ashi.
Ministry of Road Transport & Highways indang Parliamentary Consultative Committee senden nung menden ser agidang Gadkari-i, “Taruba küm 5 tsüngda North East nung gari lenmang yanglutsü atema sen lakh crore 1 agütsütsü lemteta lir” ta ashi.
New Delhi nung senden amendang National Highways & Infrastructure Development Corporation Ltd (NHIDCL) aser road safety indang onüktem benoka olemtep, ta Ministry of Road Transport and Highways sangdong ka nung metetdaktsü.
Senden nung NHIDCL-i parnoki inyakba maparen indang osang lemsatep aser iba mapang parnok dang North East aser tanga tongtipang tesemtem nung National Highways aser tanga infrastructure yangluba maparen tekaraba nung inyaktsü tetuyuba agütsü, ta MORTH sangdong nungsa ashi.
Arunachal Pradesh, Assam, Nagaland, Manipur, Meghalaya, Mizoram, Tripura, Sikkim aser West Bengal densema state 13 nung NHIDCL nem mapatong 109 inyaktsü lemzüka lir.