North east nung menoknok anok; Shillong nung yipru süi

Shillong, April 5 (Agencies) : Mongulbarnü Northeast state tem nung Richter scale asadangba nung 5.4 menoknok ka anok, ta ketdangsertemi metetdaktsü.
Mongulbar nikongtsütsü 1.12 ako meta menoknokji anok aser menoknok anokba tiyongtsüji Meghalaya kübok East Garo Hills district nung liasü, ta Shillong nung Regional Seismological Centre ketdangser kati shi.
“Onoki menoknok anokbaji metetogo saka nisung yiruba mesüra teraksa anguba osang kecha mangazük” ta East Garo Hills Deputy Commissioner, Cyril Diengdoh-i osangbener dang ashi.
North east state 8 rongnung tenet- Assam, Meghalaya, Mizoram, Tripura, Nagaland, Arunachal Pradesh aser Manipur nungertem menoknok anokba tongti tesem nung densema lir ta seismologist temi ashir.
Ano, tanü nikongtsütsü 2:00 ako meta Shillong nung yipru tesashi aonba den tzünglu aruba ajanga ki aika raksatsü.
Shillong kübok Nongmynsong, Pynthorumkhrah, Umpling, Nongrah, Golflink area, Mawlynrei aser tanga tesemtem nung yipru ajanga takoksa bener arutsü.
Mopung tashiji 24 kph liasü aser Nongmynsong nung aliba Guru Nanak Secondary School indang kilem ondok aser osettem onshi, ta Shillong nung meteorological department ajanga metetdaktsü.