North-east state tema Taiwan dang nungi angazüktsüla

Agartala, August 7 (Agencies): India nung northeast state tema Taiwan dang nungi angazüba aser kidanger Bangladesh teyari ajanga rongsenkettsüng nung tali renloka akümtsü, ta mongintemi metetdaktsüogo.
“Ozü Taiwan linük ya kanga dang tila, saka tangbo joko IT industry aser electronic oset yangluba tesem aika lir,” ta Taipei World Trade Centre nung director Tu Fu-Han-i ashi.
Brihostibar nü technology senden ka nung adenba mapang pai, “Joko küm ishika onoki inyakyim balala ajak nung terenlok bener arutetdar, balakata oset tasen yanglutetba aser IT tsütsü kangasa renlokogo,” ta paisa ashi.
“Asetkong linük asünung nüngdakba oset aiben peria monguteter. Saka semi-conductor industry, computer yanglutetba aser design & packing ajanga Taiwan-i tangar den tokteptettsüsa kümogo,” ta pai shisem.
Kaket zülur aser bushisüngdanger Subir Bhowmik-i, “Taiwan ama linük tila kati par linük nung yanglutetba osettem tanga linük aika nung amshitettsüsa yanglutetra, Tripura dena India nung northeast state temia iba ama kasa mapa inyaktettsü, kechiba süra item state tem nung nüngdakba oset peria anguba den kidanger linük tem den tongteprateptsü kanga tasak masü,” ta ashi.
Bengaluru Hinduja Global Solutions nung Chief technology officer C. Subramanya-i, “Tripura aser northeast state tem nung nüngdakba oset peria angur ajisüaka linük telung aser tanga linüktem den marketing maparen nung kanga temulung agüja nendaka inyaktsü nüngdaker,” ta ashi.
Bank of America vice-president (IT) Saumen Sarkar-i, “Agartala nung International Internet Gateway (IIG) tasembuba amenokba ajanga Tripura nung otsü sütsüsa rongsen ketsüng nung jenjang tajungba kümogo. Joko Tripura ya northeast atema IT tesep amaka akümtsü aser ibaji ajanga northeast nung internet tajungba akümtsü,” ta ashi.