North East telungpur teloktemi Maoist nem German Rifles agütsü

New Delhi, Monupii (May) 8 (Agencies): Bastar nung Maoist den khatepba tesem ka nung German assault rifle angubaji North East telungpur teloktemi Maoist nem agütsüba liasü ta Intelligence Bureau (IB) department-i ashi.
“Onok indang humanint aser techint sources ajanga ashiba agi aser taoba mapang onoki telungpur telok anati yaritepba osang angazüka aliba ama, North East telungpur teloktemi Maoists nem Germany nung yangluba prangpongtem agütsü” ta parnoki ashi.
Monupii (May) 3 nü sepaitemi Sukma kübok Kistaram tesem nung Maoist ana khaset aser idangji parnoki mongudangba prangpong ka ngutet.
“Prangpong indang tereprangtsüji asenoki (India) yangluba INSAS series mesüka liasü, saka mongin nisungtem dang prangpong sayudang, ibaji H&K (Heckler and Koch) series G3 assault rifle lir ta ashi” ta Sukma nung police ketdangser kati ashi.
Tesüiba küm 30 dak tema Bastar nung Maoist den rarayonga arudang German made assault rifle ka danga mongudangi aru.
“Onoki maneni bushisüngdang südar aser onoki tang tashi bushiteta aliba osangji IM dena agency aika nem sangoktsüogo” ta Sukma Superintendent of Police Abhishek Meena-ia ashi.
Paresh Baruah-i aniba ULFA aser NDFB, NSCN (IM) aser NSCN teloktemi Germany nungi assault rifles aika alizüker. Prangpongtem rongnung HK series G3 aser HK-33 assault rifles dena lir.
North East nung Baruah-i German prangpong-injangtem mezüng bener arua amshi ta nisung ajaki meteta lir.
North East telungpur teloktem aser Maoist tem tsüngda prangpong atema sen agütsüteba kuli ali asü mali ta osangbeneri asüngdangdang, IB ketdangseri “tang tashi onok dangi osang aruba nung senotsü agütsütepbabo mali” ta langzü.