North East United FC-i Asamoah Gyan alizükogo

New Delhi, Rongjui/September 19 (Agencies): Taoba mapang Ghana captain aser Sunderland forward, Asamoah Gyan taruba Indian Super League season nung NorthEast United FC nungi asayatsü, ta club-i Brehostibarnü metetdaktsüogo.
NorthEast United FC puri, Gyan-i ajangtetba tem indang video tatsüka sayaa liasü. Pai Bartholomew Ogbeche melentsü.
Ogbeche-i taoba season NEUFC nungi 18 ben asaya nung goal 12 idaktsü saka pa taruba season Kerala Blasters nungi asayatsü asoshi tenangzüktepba yangluogo. NEUFC puri Nigeria nunger asayar ya nüngtugu Ghana nunger asayar yagi melenogo.
Gyan, shiba AFC Champions League 2014 nung goal timtiba agütsüba asayar liasü, pa 2014 FIFA World Cup nung Ghana team captain liasü aser pa par linük nungi iba asayamung goal timtiba idaktsüba asayar aküm.
Gyan, 2003 küm nungi Ghana team nung asayaa arudar aser pai linük tenüng nungi 107 ben asayaba mapang goal 51 idakja lir.
Linük tenüng nungi asayaba dak alia Gyan, Udinese, Rennes aser Sunderland nungia asayaogo.
Gyan, Udinese nung 2003 küm nungi 2008 küm tashi asaya aser asaya 39 nung pai goal 11 idaktsü. Rennes nung 2008 nungi 2010 tashi asayaba mapang pai asaya 48 nung goal 14 idaktsü.
Gyan, 2010 küm Sunderland-i ao aser küm ana tashi asayaa liasü. Iba mapang nung pai asaya 36 nung goal 11 idaktsü.
Iba sülen Gyan, UAE nung Al Ain nungi asayaa liasü. Pa mezüngbuba küm loan nung asaya aser 2012 küm nungi 2015 küm tashi asayaa liasü.
Al Ain nung asaya 83 nung pai goal 95 idakja liasü.
Gyan dak alia NEUFC puri Maximiliano Barreiro, Subhasish Roy Chowdhury aser Kai Heerings nunger alizükogo.