North India kübok yimti aika nung mopung kanga mejungi menenogo

New Delhi, November 11 (Agencies): North India nung yimti aika Air Quality Index (AQI) nung jenjang kanga mejungi lir, ta Honibarnü Central Pollution Control Board (CPCB) osang ka ajanga metetdaktsü.
AQI nung jenjang tamajungtibaji Varanasi yimti lir, aser iba yimti AQI ji 491 lir. Iba yimti sülen Gurugram (480), Delhi (468), Lucknow (462) aser Kanpur (461) lir.
Kodang AQI ji 401 nungi 500 tsüngda nung lidir, Pollution level ji `severe` ta züngshir, koba ajanga temang anema alirtema mejungi kongshir, iba den külemi tashidak keta alirtema kanga mejungi kongshir.
Northern India nung mopung kanga menenba kulitem rongnung kaji- Punjab aser Haryana state tem nung aluyimertemi alu nung jana-ona arongba ajanga lir.
Tesüiba anogo ishika tsüngda linük yimtiba, Delhi nung mopung kanga menenogo, aser tang iba yimti-a AQI `severe` category nung lir.
Mokozü den tzüsü ajanga gari lenmangtem nung nisung, gari aser lenmang junga mengui senzüsempong nung timtem ajurur, iba den külemi temang nunga timtem adokdaktsür. Ibayongji Delhi nungbo school aser college aika shibanga lir.
Delhi nung mopung kanga menenba ajanga tanü United Airlines-i Newark-Delhi flights thinentsüogo.