North Korea dak sarin mim amshitsü tashi lir:Japan PM

Tokyo, April 13 (Agencies) : North Korea-i menunui nuclear trokbuba den ano missile tanga kar tendangtsü akok ta mulung melemi bilema aliba mapang Japan Ato Kilonser Shinzo Abe-i, North Korea-i missile talak nung ‘sarin’ mim amshitsü parnok dak tashi lir, ta Brihostibarnü ashi.
Sarin mim tango yagi tezü nung timtem agütsür.
Parliament amendang senden ka nung Abe-i, “North Korea dak joko sarin mim missile lak nung inoker amshitsü asoshi tashi lir,” ta ashi.
1995 küm Tokyo nung kanga dang mazüngi aliba train sub-way pungu tashi nung sarin nerve gas amshia amakdang nisung 12 tashi asü aser nisung million aika shirangdangtsü.
Korea peninsula nung tensa mejungi akümbaji Pyongyang-i maneni nuclear aser missile tem tendangba ajanga lir. Iba inyakyim anema US-i tenokdangba agütsüogo aser mangara Navy yoka item tendangba nung timtem aludaktsütsüsa inyaktsü metetdaktsü.
Honibarnü North Korea linük akümer, Kim Il Sung sor küm 105 ajungba anogo lir. Iba anogo dang ya parnoki North Korea nunger indang ‘Anü Anogo’ ta ajar. Tesüiba mapang lenirtemi iba anogo nung linük nung aliba raradang amshiba osettemsa tendang.
North Korea-i taküm küm tenzüker missle aikasa tendangogo, aser tesüsabuba tendangbaji parnoki anüdoklen tzüküm nung ballistic missile ka akhaba liasü. Parnoki tesüsa buba Nuclear tendangbaji yaküm September 9 nü liasü.