North Korea den rara tulu adoktsü akok:Trump

Washington, April 28 (Agencies) : US Tir Donald Trump-i, South Korea den ‘free-trade’ tenangzüktep anentsü aser North Korea den rara kangasa tulu ka adoktsü akok, ta ashi.
Donald Trump Tir mendeni tur anogo 100 ajungnü osangbenertem den jembiba mapang pai, North Korea den nuclear tebilemtsü yimjung inyakyim ajanga bentettsü imlar, ajisüaka rara tulu kabosa adoktsü amai bilemer, ta ashi.
“North Korea den onok rara tulu ka adoktsü. Aji ataloktsüsa,” ta Brihostibarnü Trump-i osangbenertem den jembiba mapang ashi.
Onoki iba ya tangatettep tajung agi bentetner saka ibaji inyaktsü lenmang kanga mesüa aser saaka kümogo, ta pai shisem.
Secretary of State, Rex Tillerson-i, North Korea den olempet akatsü mulunga lir aser onoki par yimsüsüba yimya nung teka maitsü, ta ashiba anogo nung Trump-i item o jembia liasü.
Tir, Trump-i, South Korea den küm pungu atema ‘free-trade’ tenangzüktep yua aliba jembishitsü mesüra anenatoktsü kechiba süra linük ana tsüngda shishilembaba nung takoksa tulu adoka lir, ta ashi.
“Ni tekaratiba nung iba inyakyim anenba sangdongtsü,” ta Trump-i osangbenertemi asüngdangba ka langzüdang ashi.
Iba osang ya South Korea Finance Ministry atema taoksatsü osang ka lir aser South Korea Finance Ministry-i, linük ana tsüngda shishilemba tenangzüktep tsütsü US nungi kecha temepishiba onok dangi maru, ta osangbenertem dang ashi.
Trump-i iba osang metetdaktsüli South Korea Kospi index SEU, -0.18%-i alu.
South Korea nunger export tsütsüa kanga mejungi kongshi. Gari yanglur Hyundai Motor Co, 005380, -2.04% , 2% agi tajemba aküm aser LG Electronics 066570, -4.43% -a 4.2% agi tajemba aküm.
Ano Trump-i, North Korean ballistic missiles nokdangtsü asoshi tang U.S. military-i sen billion 1 alangba THAAD anti-missile system amenokba sen South Korea-i agütsütsü imlar, ta shisem.