North Korea den tanabuba senden akatsü Trump-i jangjashitsü

Buenos Aires, Luchii/December 1 (Agencies): US Tir Donald Trump-i Rogonü South Korean tir Moon Jae-in-i dang, pai North Korea lenir den tanabuba senden kanür ta ashiba, White House-i metetdaktsü.
Trump aser Moon na Buenos Aires nung G20 summit akaba mapang ajurutepa liasü aser iba mapang North Korea denuclearization dak sendakba nung nükjidong matalok tashi bendanga inyaktsü züngsektep, ta Trump otongdar Sarah Sanders-i ashi.
Tenati tang benoka aliba sanctions tem tashi taitba benoka DPRK nem denuclearization dak alaka tanga lenmang kecha mali ta angatetdaktsütsü mulungtep, ta laisa ashi.
Ajisüaka Trump-i, Singapore nung Aami/June otsü tasen ka yanglua North lenir den ajuruteba sülen tanaben pa den ajurutepner ta jangjatsüogo. Pai parnok nem nuclear weapons tem agindaktsütsü asoshi merangdanga arudar.
“Tir Trump-i US-DPRK summit tanabub akatsü asoshi pa tebilemba sensaksemogo,” ta Sanders-i ashiba den taruba jenjang asoshi lenir ana tsüngda bendanga agüja inyaktsü züngzükshiogo. Moon indang press secretary, Yoon Young-chan-i ashiba agi, “Korean Peninsula denuclearize asütsü inyaktepba mapang ka nung taruba senden asoshi US aser South Korea na sendaktepa alitsü shiogo.
Secretary of State Mike Pompeo aser North Korea nungi tongtibang ketdangsertem Yimpoksüi/November tetenzüklen ajuruteptsü asoshi sentong liasü saka North Korea-i parnok anema sanction benoka aliba tajemba kümdakjang ta akhangba sülen iba senden ya ajungbena athi.