North Korea envoy, Choe-i Geneva bushia ogo

Seoul, November 15 (Agencies): US nungi tongti ketdangser aser lenirtem den senden ka amentsü nükjidong nung North Korea’er North American Affairs Deputy Director, Choe Son-hui-i Switzerland kübok Geneva bushia aoba osang ka South Korea’er foreign ministry-i tanü, Mongolbar nü metetdaktsüogo.
Choe-i Geneva tonga aoba jakdang, China yimtiba, Beijing tayimtsü anendak anenzüka, lai aki tembartem den ajuruteptsü asoshi Geneva bushia aoba osang ka metetdaktsüogo.
Malaysia yimtiba, Kuala Lumpur nung taoba October ita senden amenba amala senden ka taoba US yimsüsür aser lenirtem den amentsü nükjidong nung Choe-i tan Geneva semdanger asütsü akok ta S Korea ministry den Seoul nung alir N Korea den sentakba osangtsüsang agir mongintemia metetdaktsüogo.
Par linük ana tsüngda adokba mangatettepbaren bentettsü nükjidong nung N Korea’er vice foreign minister, Han Song-ryol aser North’er UN Ambassador, Jang Il-hun nati taoba US ambassador, Joseph DeTrani o Robert Gallucci na den taoba October ita 21-22 nü tashi senden mena liasü.
Choe-i tan Geneva nung US lenirtem den ajurutepbaji Republican yimtenren telok nungi Tir candidate, Donald Trump-i Tir election nung takok ngua, US Tir tasenba akümtsü temeten anguba sülen tan mezüngsüa US lenirtem den ajuruteper asütsü.
N Korea lenisang, Kim Jong-un aser par yimsüsütsüren den sentakba nung Trump’er tangatetba lazüktsü nükjidong nung Choe-i US lenirtem den ajurur asütsütsü akok ta aikati bilemtsü tenzüka lir.
N Korea-i United Nations (UN) aser US na densema, alima ashi mangai par tongpang nung amhitsü nuclear osettsüset yanglutsü aser kasaji rizüngtsü mapatong tanen makai inyakba ajanga US aser N Korea na tsüngda angatetteptsü senden takok ngua mementeti tang anendaka lir.
Pyongyang-i par tongpang nung amshitsü nuclear osettsüset yanglua rizüngba mapatong anenba sülen ang par linük den yimjung senden amentsü lemteta, US Tir, Barack Obama aser pai aniba US sorkari Pyongyang’er nuclear mapatong anentsütsü nükjidong nung par linük anema tenokdangba sentong balala benoka lir.

You must be logged in to post a comment Login