North Korea-i ano US senso ka pua ayu

Pyongyang, May 7 (Agencies) : North Korea-i, “Linük anema inyaker ta temulung melemi bilemba America senso ka onoki pua yuogo, ta ashi.
Iba osangji shitak asü nungbo parnoki tan agi joko US nunger nisung pezübuba apur asütsü.
Honibarnü pua ayusang, Kim Hak Song ya Pyongyang University of Science & Technology nung inyaka liasü, ta North Korea osang ajanga ashi.
“American senso Kim Hak Song ya May 06, 2017 nü Democratic People’s Republic of Korea (DPRK) ozüng kübok linük anema inyaker ta temulung melemi apu,” ta kasa osang ajanga ashi.
Parnoki apuba US senso tasembubaji Kim Sang Dok lir. Pa-a Pyongyang University of Science & Technology nungsa inyaka liasü aser pai linük anema inyaker ta temulung melemi bilema pua ayu, ta North Korea official sangdong ka ajanga metetdaktsü.
North Korea-i nuclear osettem tashi mangai tendangpet tendangba ajanga Pyongyang aser Washington na tsüngda Korea peninsula nung tensa kanga mejungi akümba mapang ka US-i rara tenzükner ta shia item nisungtem pua ayu.
Pyongyang University of Science & Technology (PUST) ya evangelical Khristan temi nguteta 2010 küm lapok. Iba school nung azüngertemji ajak amai linük nung tongtibang nisungtem indang chirtem lir.
Ano tanüngba US senso ana parnoki pua alibaji arishi küm 22 tain, kaketshir Otto Warmbier aser arishi küm 62 tain, missionary Dong Chul na lir.
Warmbier nem küm 15 aser Kim Dong Chul küm 10 tepuokdak ayutsü abendang agütsüogo.