North Korea-i Canada nunger sannüker ka merenshir

Pyongyang, December 16 (Agencies): North Korea nung tentetba Supreme Court-i Canada nunger sannüker ka nem taküm tepiyong tepuokdak puoktsü temerenshi tanü Bodbar nü agütsüogo.

N Korea linük anema inyakba ken o nung aitsüba sülen taküm February ita nungi tenzüka tepuokdak puoka ayusang, Hyeon Soo Lim tepuokdak puoka mapa tasak inyakdakja merenshitsü obendangji tanü agütsü.

N Korea sorkari taküm July ita Pyongyang yimti nung ayongba osangbener den ajuruteptsü sentong nung Canada kübok Toronto yimti nung tentetba Light Korean Presbyterian Church nung sannüker, Lim-i N Korea sorkar astüngdoktsü mapa inyak ta shia, pai aibelenba nangzüka liasü.

Ajisüaka, Pyongyang-i taoba mapang tepuokdak puoka yur chiokertemi ashiba agi, Lim-i nangzükba ama, parnok tepuokdak puoka alidang parnokia aibelenogo ta sorkar ketdangsertemi tashiyim agi nangzükdaktsü.

Arishi küm 60 tain Lim-i taküm January ita 31 nü N Korea semdanga par arogoi idakji tentetba nursing home, nursery aser orphanage nung inyakertem den ajuruba osang ka par kinünger aser külem inyakertemi metetdaktsüogo.

Parnokisa ashiba agi, Lim-i 1997 nungi tenzüka taküm tashi nung Pyongyang 100 ben den timba semdanga nüburtem den yaritepa lir anungji, pai N Korea’er yimtenren jenjang raksatsütsüsa shilem agia mali.