North Korea-i Facebook, Twitter aser tanga website ajak nokdaker

Pyongyang, April 01, 2016 : Online ajanga tongtibang osangtsüsang kanga prokshiba ajanga North Korea (NK) nung Facebook, YouTube, Twitter aser South Korea nunger indang websites tem nokdanger, ta official süa metetdaktsüogo.
Iba osang ya Ministry of Posts & Telecommunications-i tan hopta linük indang mobile service provider, Koryolink nung post süja liasü.
North Korea nunger ishikati dang internet amshir. Tanüngba nüburtemibo sorkar indang intranet shibanger aliba ka dang angur. Ajisüaka bendangertembo Web kecha tetsükdaktsü melii amshitsü 2013 küm nungi temelaba agüja lir, saka sorkari parnok web amshiba miter.
Tang item social media aser website tem  ya shibangba sülenbo bendanger aser bendanglen nungi linük nung arua alirtemi linük nung atalokba lemsateptsü kanga tasak akümtsü. Iba den külemi linük atema tangari internet nung osang prokba parnokia memetettsü.
Linük sorkari YouTube, Facebook, Twitter, Voice of America aser South Korea indang media site tem mapang tatsüka atema shibanga atar, ta metetdaktsü.
Parnokisa sen asayaba aser “sex & adult websites” tem dena shibanger ta ashi.
Facebook aser Twitter nabo joko ita ishika mamshiteter.
Nisung shibai item shibangtsür aliba website hack süa lapoka ozüng alema benshidir North Korea ozüng kübok merenshitsü, ta metetdaktsü.