North Korea-i Hydrogen bomb yangluogo: Kim Jong Un

Pyongyang, December 10 (Agencies): North Korea-i tongpang nung amshitsü hydrogen bomb tesashi ka yangluba osang ka N Korea lenisang, Kim Jong Un-i metetdaktsüogo.

“Ozü linüki Atomic bomb aser Hydrogen bomb pokdaktsütetba nuclear oset tasen yangluogo,” ta Kim-i yashi Brehostibar nü sangoktsü.

Kim-i par yimtiba, Pyongyang nung tentetba tongti mitkar tesep, Phyongchon Revolutionary Site semdangdang iba osangji sangoktsü ta sorkari ketdang asüba KCNA news agency-i osang jangjashitsü.

Technology tasen amshia yangluba yong atomic bomb dang nungi thermonuclear bomb ta ajaba hydrogen bomb tesashiba lir.

Ajisüaka, Kim-i yashi sangoktsüba bomb takok ngua yangluba osangji tamendakdak maliba osang ka lir ta South Korea sorkari ketdang asüba Yonhap news agency-i tanü Brehostibar nü metetdaktsüogo.

S Korea’er intangitertemi kanga junga bushisüngdangba sülen Kim-i yashi sangoktsüba osangji tamendakdak maliba osang ka aliba bushitetogo ta osangi shisem.

Ano külen, United Nations (UN) ashi mangai, Pyongyang-i taoba mapang, 2006, 2009 aser 2013 nung tongpang nung amshitsü nuclear oset ali telung nung tendangba bushiteta, United Nations Security Council (UNSC)-i tang N Korea anema rongsenren tenokdangba sentong tesashi benoka lir.