North Korea-i intercontinental missile ka tendangogo

Pyongyang, July 04 (Agencies): North Korea lenir, Kim Jung-un-i repranga lia mezüngbuba intercontinental ballistic missile (ICBM) takok ngua tendangogo aser iba missile ajanga alima nung tesem mashi ka tongtettsü, ta North Korea-i ashi.
Hwasong-14 missile ya ali nungi anüngleni minute 39 agia kilometre 2,802 atu aser target shidak nung kongshi, ta North Korea indang television ajanga ashi.
Iba missile ya North Korea indang anülulen aliba tesem nungi anüdoklen aliba tzüyim len Mongulbarnü khaloktsü, ta South Korea aser Japan ketdangser temi ashi.
Mejangjaba ballistic missile ya 00:40 GMT ako meta North Pyongan provinve nung aliba Banghyon anasa nungi khaloktsü aser kilometre 930-shi orr Sea of Japan nung tsük, ta South Korea indang mitkartemi sangdong ka nung ashi.
Mitkartemi bushisüngdangba nung iba ya ICBM asütsü südi ta bushitet, ta South Korea tir, Moon Jae-in-i ashi.
Iba missile ya anüng nung minute 40 jaja, ta Japan indang Chief Cabinet Secretary, Yoshihide Suga-ia osangbener dang ashi.
“Iba ama ballistic missile tendangba ya kodanga memelatsüla aser Japan-i aitsür,” ta pai shisem.
North Korea-i intermediate range ballistic missile ka tendangogo, ta US mitkar indang Pacific Command ajanga ashi.
“North Korea-i missile tendangba ajanga North America nem timtem magütsütsü, ta North American Aerospace Defense Command (NORAD)-i asadangtetogo,” ta kasa sangdong ajanga ashi.
Pyongyang-i June ita tetenzüklen missile kar tendangba sülen tanü ya mezüngbuba tendangogo aser North Korea-i nuclear aser missile tendangba azüoktsü asoshi US, China, Japan aser South Korea nungi lenirtemi July 7 nungi 8 tashi Hamburg, Germany nung G20 summit aliba mapang jembitsü imlar.
“North Korea-i tanü takok ngua tendangtetba ya kanga tongtibang lir, kechiyong iba missile ya kilometre 6,500 tashi jajatetba sentong ka takok ngua tendangtet,” ta nuclear defence & proliferation nung mongin, Tong Zhao-i Beijing nungi osangbener den jembidang ashi.
Aji süaka iba missile yagi US linük metongtettsü, kechiyong US ya North Korea nungi kilometre 8,000 bilar lir, ta Tong-isa shisem.
“Anu maneni North Korea-i missile tendangogo aser international community-i tekümdangtsü ashiba senzüka yutsüba sayur,” ta Japan Ato Kelonser, Shinzo Abe-ia osangbener dang ashi.
South Korea tir, Moon Jae-in aser US tir, Donald Trump ajuruteba Pyongyang tebilemtsü lemsateptsü asoshi anogo ka lia iba missile ya tendangogo.
May 10, 2017 nung Moon-i South Korea tir menden agüzükba sülen North den tesendaktep tajungba küma yanglushitsü asoshi meranger, saka Kim Jung-un-i missile yangluba maparen manener.
July 4 nü US nung Independence Day amongtsü lia iba missile ya tendangogo aser taoba mapanga iba anogo anasa North Korea-i missile tendanga aru.
Korean Peninsula nung US aser South Korea mitkartemi inyaksangshi anentsü aser North Korea-i nuclear aser ballistic missile sentongtem anentsü asoshi Beijing-i inyaktsü, ta China nunger UN nung ambassador, Liu Jieyi-i ashi.
“North Kores-i anu missile ka tendangogo. Parnok taküm nung iba dang tajungba inyaktsü kicha malia na?” ta US tir, Trump-i Twitter nung zülutsü.
“Iba amala inyakyim ya anendaktsüstü asoshi China-i akang-akanga nokdaka inyaktsüla,” ta US tir-isa Twitter nung zülutsü.