North Korea-i mashi mapang nung missile tendangtsü

Seoul, January 09 (Agencies) : North Korea-i, “Onoki mashi mapang ka nung ozü lenir Kim Jong-un-i shimtetba tesem mashi ka nung intercontinental ballistic missile (ICBM) tendangtsü. US inyakyim tamajung ajanga iba ama raradang amshiba oset renemshitsüsa akümer,” ta ashi.
Kim-i, linük nung ICBM tendangtsü mapang anasa arudar, ta January 01, 2017 nü ashi.
“ICBM ya mashi mapang ka nung DPRK lenir Kim-i shimtetba tesem mashi ka nung tendangtsü,” ta Deobarnü official KCNA news agency-i ashiba foreign ministry nung otongdari metetdaktsü.
Deobarnü US defence secretary, Ashton Carter-i, North Korea meyong nuclear aser ballistic missile sentong nung US atema lendong tulu keta lir, ta ashi.
North Korea-i tendangba aser kahloktsüba missile tem linük nung aser tembar linüktem nung timtem agütsütsüsa arura ibaji kahdoktsü Washington-i renema lir,” ta Carter-i NBC osangbenertem tem den senden amendang ashi.
North Korea-i yaküm aiben tendangba sülen taoba Brihostibarnü parnok nuclear aser missile tsütsü tashi ita renemshiba sayuogo, ta US-i ashi.
North Korea-i ICBM tendangtsü ta shiaka ibaji shitak inyaktettsü atema küm aika agitsü, ta mongintemibo shiogo.
Kodang North Korea indang ICBM ji kanga junga renemtetdir iba jagi par linük nungi kilometre 9,000 pilar aliba US nung lendong agütsütsü temela asütsü.
Norteh Korea-i ICBM tendangtsü ta sangdongba langzüa, tang US Tir asütsü shimteta alisang, Donald Trump-i, Kim-i ICBM tendangtsü ta sangdongbaji mataloktsü, ta tweet asü.
2006 küm nungi UN-i North Korea nuclear aser ballistic missile tendangba maparen nokdanger. Ajisüaka North Korea-i September 9, 2017 nü pungubenbuba nuclear tulutiba tendangba sülen iba tenokdangba tali akangshiogo.