North Korea-i missile tendang: South Korea

Seoul, June 08 (Agencies): North Korea-i Wonsan, Gangwon Province nungi missile kar tzüyim nung khaloktsü, ta South Korea indang defence ministry ajanga ashi.
Lendong nungi kümzüka alitsü asoshi South Korea kümdangshitsü tenzükogo, ta shisem.
North Korea dang missile meyanglutsü asoshi United Nations (UN)-i tenokdangba agütsür aser US-i par tashi amshia North Korea den raratsü atema densa tamajungba kümer hopta pongu tsüngta nung Pyongyang-i missile pezü tendangogo.
UN indang temzüng nung aliba raksa-a North Korea-i ballistic missile maneni tendangba ajanga US-i North Korea lenir kar anema yanglua aliba temzüng tasenba ya UN-i taoba hopta agizüka lir.
UN-i yanglua aliba temzüng tasenba ya North Korea-i taoba Deobarnü aitsü aser nuclear amshia raraba osettem maneni yanglutsü nangzük.
“Alima ajungai tenokdangba agütsüba ajanga North Korea kodanga makoktsü, ta alima dang sayua missile tendanger,” ta University of North Korea Studies nung Professor, Yang Moo-Jin-i osangbener dang ashi.
“South Korea-i US indang nuclear submarine aruba tejashi sayur,” ta pai-sa shisem.
Ton 6,900 taret, USS Cheyenne ya shidakba bo Pearl Harbor nung ayur, saka iba submarine ya Mongulbarnü South Korea indang rong anendak tesem, Busan-i aru. North Korea-i UN temzüng alema inyakba ajanga US-i parnok tashi sayu tenzükogo.
Taoba hopta ana tsüngta US nunger tayimtsü abenba rong ana den iba rong meina rong aika arua Sea of Japan nung Pyongyang dang tashi sayua mitkar inyakyim balala nung training agüja liasü.
Taoba ita tetenzüklen North Korea-i meta talang tongtetba ballistic missile ka tendang aser iba missile ajanga US linük tongtettsü, ta sangdonga lir.
Taoba küm tetenzüklen nungi North Korea ajanga atomic bomb ana aser missile ter dak tali tendanga arudagi.
Tanga linük nungi khaloktsüba missile lazüka nükjidong metongteti raksatsütsü sendong ya US mitkartemi takok ngua tendangogo, ta ashir.
US-i agütsüba lendong nungi kümzüka alitsü asoshi nuclear indang raraba oset nüngdaker, ta North Korea-i tawa shia liasü.
Ozüng tesashi magütsüi yimjung ken o jembitsüla, ta North Korea indang tembar, China-i ashir. Saka North Korea-i missile aser nuclear tendangba anen nung dang yimjung ken o jembitsü, ta US-i ashir.