North Korea-i missile tendangba atema tebilemtsü akar: India

New Delhi, July 07 (Agencies): “DPRK (Democratic People’s Republic of Korea)-i tanen makai nuclear aser ballistic missile programme akaba ajanga alima yimjung amokmerener,” ta tanü External Affairs Ministry-i sangdong ka nung metetdaktsü.
“Iba ya ajangasa India linük security-a kongshir,” ta sangdong ajangasa ashi.
July 04, 2017 nü North Korea-i, linük lenir Kim Jong-un tetuyuba nung ajemdaker parnoki mezüngbuba intercontinental ballistic missile (ICBM) takok ngua tendangogo, ta sangdonga liasü.
Osang ajanga ashiba agi, Hwasong-14 missile ji anepdang 9:40 ako meta North Pyongan province nungi khatok aser anünglen kilometer 2,802 tashi atuba sülen kilometer 933 oor East Sea nung anen.
Japan Ministry of Defence nung public affairs officer, Takahiro Hirano-i ashiba agi, iba missile ji Korean Peninsula anüdokelni ao aser Japan linük Exclusive Economic Zone nung anen.
India External Affairs Ministry-isa, “India-i DPRK dang alima yimjung meraksatsü atema iba ama meinyaktsü mepishir,” ta metetdaktsü.
“Onokisa alima linüktem danga longjemer item programmes pusemer linüktem nem temerenshi agütsütsü atema inyaktsü mepishir,” ta sangdong nungsa shia lir.
Tanep Germany, Hamburg nung G20 senden alidang, BRICS (Brazil, Russia, India, China, South Africa) lenirtema jurila senden ka mena liasü, aser iba mapang nung Ato kilonser, Narenda Modi-ia kasa tebilemtsü lemsatepa liasü.
Modi-i, “Tang Gulf linüktem den North Korea aser East Asia nung tatalokbatem ya tebilemtsü tulu ka lir,” ta metetdakja liasü.