North Korea-i rocket amenokba tesem tanaben yanglushir

Washington, Metsüremi/March 06 (Agencies): Taoba küm disarmament tezüngzüktep agiba nung shilem ka ama North Korea-i rocket amenokba tesemtem raksar aliba tanaben yanglushir, ta Bodhbarnü osang ka ajanga ashi. Ibai Kim Jong Un aser US Tir Donald Trump na tsüngta senten amenba nung tenangzüktepba kecha magiteti tembanger hopta ka lir osang arur alitsü.
Satellite ajanga tangokba noksa tasentem nung Tongchang-ri launch site nung ki kar tanaben yanglushiba mapa February 16 aser March 2 tsüngta tenzükba sayuogo, ta North Korea studies nung takotet website 38 North ajanga ashiba osang ka Associated Press-i sangdong.
Ki-o-jen yanglushiba nung rail-mounted transfer building ka dena lir aser iba atema jara tasen yanglua kilem inokogo, ta 38 North ajanga ashi. Goltem tendangba tesem nung gol sota ayutsü yangluba osettema tanaben yanglushiogo aser fuel & oxidizer building nunga kilem tasen inokogo, ta osang ajanga ashi.
South Korea nunger indang osangkaket JoongAng Ilbo ajanga Bodhbarnü ashiba agi, linük itdangiterba telok ajanga North Korea launch site indang asadangba ozüng yanglurtem dang Mongulbarnü metetdaktsüogo. Saka tenüng magütsüi aliba ozüng yanglur indang office nungibo tang tashi iba osang kaket nung sangdongba indang jangjashija mali.
National Intelligence Service director Suh Hoon-i ozüng yanglurtem dang rocket amenokba tesem nung kilem aser kishitem yanglushiba indang rasaa ashi, ta JoongAng Ilbo nung shia lir, saka iba senden nung ozüng yanglurtem adenba indang tejangja shia mali.
Nuclear atema yimjung meyanglutetba mapang ka nung North Korea-i long-range missile test-launches tanaben tenzükshitsü asoshi renemshiba angur, ta Suh-i iba senden nung ashi, ta kasa osangkaket nung shia lir. Washington den ken o junga jembiteta ora North Korea-i denuclearization atema bendanga agüja inyaker ta US nungi tesemdangertem dang sayutsü mechi tajungtiba nung iba tesem raksaa indoktettsüsa yanglushi südi, ta Suh-isa ashi.
Iba tesem ya satellite anünglaki khaketa yoktsü aser gol tendangtsü atema amshia aru saka kodanga ballistic missile tendangtsü atema mamshi, ta BBC ajanga ashir. Taoba küm US aser South Korea den jembishinü tenzükba sülen North Korea-i mera tasentem agiba rongnung iba tesem raksaba ya ka liasü. Saka jembishinü anendakba ama nuclear tendangba tesemtem raksaba anendaka lir.
North Korea-i nuclear nok-o-nü sentongtem ajunga metoktsüra tenokdangbatem tali tesashiba ajurutsü, ta U.S. National Security Adviser John Bolton-i Mongulbarnü nenshia ashi.
“Parnoki ibaji inyaktsü memulungra parnok nem rongsenketsüng tsütsü tenokdangba agüja aliba nung anisüngzük magütsütsü ta Tir Trump-i jangja jangja shoa lir. Aser onoki item tenokdangbatem tesashiba kümdaktsütsü,” ta Bolton-i Fox Business Network dang ashi.
Taoba hopta Hanoi nung North Korea den senden amenba nungi Trump ajungbena ayazüka ao aser denuclearization atema bendanga agütsür mapa inyaktsü ta tenangzükba tajung magi tashi Kim Jong Un-i tenokdangba ajunga agientsü akhangba ama US-i inyaktsü memulunger, ta shia liasü.
Saka Trump-i ashiba ama masü, North Korea-ibo par linük nung aliba nuclear complex tulutiba shibangtsü mechi tenokdangba kar agienang ta akhang aser raraba oset yutsütsü atema mera tasen agitsü United States-i akhangba sülen ken o tembanga mejembitet, ta ashi.