North Korea-i UN telemtetba anema inyaker: EU

Brussels, January 06 (Agencies): North Korea-i United Nations (UN) telemtetba aser tetuyuba anema inyaker ta shia, N Korea-i hydroden bomb tendangba maparen aitsüba olen ka European Union (EU)-i tanü Bodbar nü metetdaktsüogo.
N Korea-i tongpang nung amshitsü hydrogen bomb ka tanü tendangba osang alima dang sangoktsüba sülen alima lenirtemi tebilemtsü khuret tulu benoka lir.
Ali anokzübaren tendanger mongitemia Pyongyang-i mima bomb pokdakja tendangdak anasa magnitude 5.1 tesashi ali anokba osang bushitetba osang jangjaogo.
N Korea lenisang, Kim Jong-un arishi küm 33 tain akümtsü anogo 2 jakdang tanü hydrogen bomb-ji tendangtsü ozüng agüja liasü.
Ajisüaka, Pyongyang-i tanü tendanga pokdaktsüba bomb-ji shitakba hydrogen bomb masütsü akok ta bomb mongintemi metetdaktsüogo.
“Tongpang nung amshitsü hydrogen aser nuclear bomb-tem yanglua metendangtsü tenokdangba UN-i Pyongyang anema benoka lir. Ajisüaka, Pyongyang-i tanü shitakbasa hydrogen bomb tendang ta kuli bushitetra, ibaji UN anema inyaker asütsü,” ta EU Foreign Affairs lenila, Federica Mogherini-i metetdaktsü.
Ano külen, United Nations Security Council (UNSC)-ia N Korea-i bomb tendangba den sentakba onük benoka jembitsü asoshi rongdak senden ka ayongba osang jangjaogo.
“United States aser Japan nati ayongba sülen UNSC sendenji amentsü renem,” ta UN ketdangser kati metetdaktsü.
Ajisüaka, linük 15 densemba UNSC-i N Korea nem kechi telangzüba agütsütsü renem iba osang tang tashi mejangjateti lir.
2006 küm nungi tenzüka UNSC-i Pyongyang anema nuclear tongpang osettsüset yanglua metendangtsü tenokdangba benoka lir.