North Korea-i US den ajurua jembitsü molunga lir: Diplomat

Beijing, May 13 (Agencies): North Korea den tapet süra Pyongyang-i United States den ajurua jembitsü molunga lir, ta North Korea indang senior diplomat kati ashi.
“Tapet yimya nung süra US Tir, Donald Trump indang yimden den jembitsü ozü lima-i molunga lir,” ta North Korea indang Foreign Ministry nung tekolak, Choe Son-Hui-i Beijing International Airport nung osangbener den jembidang ashi.
La ya Oslo nung US shisa meteta alir, taoba mapang US kentdangser Thomas Pickering, taoba mapang United Nation nung US envoy aser taoba mapang ‘non proliferation & arms control’ department nung ‘special adviser’, Robert Einhorn nungertem ajurur tanaben North Korea-i meyiba aruba mapang iba o ya ashi.
April ita North Korea lenir asoba benjungmong nung nuclear tendangba tamakok aluba sülen Korea tzükümlen mitkartem tebilemtsü tuluba aküm aser iba tebilemtsü tera tesüngjemba akümba mapang iba senden ya amen.
North Korea-i nuclear bomb yangluba manenra mitkartemi parnok mapa tenzüktsü, ta Trump-i jembia aruaka May ita tetenzüklen pai North Korea lenir, Kim Jong-Un den tangatettep kati arutsü asoshi onüktem jembitsü molunga lir, ta shia lir.
Moon Jae-In, shiba iba hopta tetenzüklen South Korea tir aküm, pai Pyongyang aser Washington na tsüngda tangatettep kati arua linük ana tsüngda tesendaktep tajung yanglutsü kanga molunger.
Bhodbarnü tir menden asoshi tezüngzüktepba agiba sülen tapet yimya nung North Korea semdangtsü molunga lir, ta Jae-In-i ashi.
South Korea sorkar tasenba den ajurua tesendaktep tajungba kümdaktsütsü asoshi Pyongyang tebilemba ali mali, ta asüngdangdang, “Reprangdangti,” ta Choe-i langzü.