North Korea-i US nuclear agi amaktsü koka lir

April 15, 2017 nü Pyongyang nung North Korea ngutetsang Kim Il SungNorth sor küm 105 jungmung nü North Korea lenir Kim Jong Un (Achiji)-i military parade nung shilem agirtem nem teka ayiploktsüba noksa nung angur.

Pyongyang, April 15 (Agencies) : Honibarnü North Korea-i US dang par tesemlen parnok jashitsüsa mapa kecha teinyak, ta metetdaktsüogo.
Iba mesükba mapa inyakra nuclear amshia amaktsü, ta parnokisa ashi.
Parnoki iba temetettsü ya North Korea linük ngutetsang aser tang linük lenir Kim Jong-un tebou, tesüiba mapang Tir, Kim Il-sung sor küm 105 jungmungnü metetdaktsü.
Pyongyang nung parade tulu ka ayonga agi aser iba mapang Kim Jong-un ano nuclear tasen tendangtsü tetuyuba agütsütsü imlaa liasü, ta osangbenertemi ashi.
Parnoki iba anogo nung intercontinental aser submarine-launched ballistic missiles (SLBMs) tem sayu. Item missile rongnung karbo kilometer 1,000 tashi aoba dena liasü.
Ano parnoki sayuba missile rongnungjisa intercontinental ballistic missiles tasen tapu ana dena liasü, ajisüaka item missle anaji tendanger aser medendangar mejangjatetter, ta mongintemi ashi
US indang tayimtsütem North Korea tesemleni nunga aruba ajanga parnoki North Korea tashi sayua liasü.
“Onok den raratsü purtem den onoki raratsü kanga junga renema lir,” ta North Korea nung ketdangser tashi taittiba rongnung tanabuba ta züngshia alisang, Choe Ryong-hae-i ashi.
“Onok nuclear agi amaker dak onokia nuclear agisa meyipba amaktsü renema lir,” ta paisa ashi.
Noklang nok amba sepaitemi Kim Il-sung asoba anogo nung (Day of the Sun) Pyongyang nung aliba Kim Il-sung square nung shilem agi aser lenir Kim Jong-un tanak sobutsü sobur repranga liasü. Pa iba sentong reprangdang teka madena aser menürema repranga liasü.
“Raraji mashi mapang ka nung adoktsü aser rara nungji takoker malitsü,” ta Hokolbarnü China Foreign Minister, Wang Yi-i ashi.
Tan iba parade nungbo tesüiba mapangtem nung ama China nungi shinga dena malisaü, ta osangbenertemi metetdaktsü.
Brihostibarnü US Tir Donald Trump-i, “North Korea tebilemtsüji kokttettsü,” ta ashi.
“China-i yaritsü mulungtet nungbo kanga junger asütsü, ajisüaka parnoki meyari yonga onoki inyaktettsü,” ta US-i ashi.