North Korea ya takar lima kümdaktsütsü : US

Nuclear tendangba lungpoktem pokdoktsü

Washington/Seoul, Monupii 12 (Agencies) : Kim Jong Un-i aniba yimteni par nuclear osettem ajunga bendanga agüja nuclear sentongtem toktsüra, North Korea lima yanglushitsü atema inyaktsü aser takar lima kümdaktsütsü, ta United States-i nangzüka metetdaktsüogo.

Taruba June 12 nü Singapore nung North Korea lenir, Kim aser US Tir, Donald Trump na temaba jenjang nung senden amentsü atema US official-tem kanga dang mezüngi teimla tulu nung renemshiba mapang tang US Secretary of State, Mike Pompeo-i iba tenangzükbaji metetdaktsü.

Pompeo shibai anogo ishika tejaklen Pyongyang lenir den ken o jembiogo, paisa ashiba agi, “Nükjidong kba lemsatepogo, iba atemaji ozü linük ana tsüngda tangatettep tajung ka renema lir.”

Washington aser Seoul na tsüngda senden amentsü atema amalitep akatsü asoshi South Korea Foreign Minister Kang Kyung-wha den ken o jembiba sülen Pompey-i iba tenangzükbaji metetdaktsü.

Ano tanga osang ka ajanga ashiba agi, tan ita tatemlen par nuclear tendangba tesemtem poksaa endoktsü, ta tanü Küptoknü North Korea-i metetdaktsüogo.

United States den temaba jenjang nung senden amentsü aliba jakdang parnoki tang ibaji inyaktsü telemtetba agiogo, ta North Korea nungi Korean Central News Agency (KCNA) ajanga metetdaktsü.

Bendang linüktem nungi jaokba osangbenertemi repranga lia nuclear tendangba lungpoktemji (tunnels) pokdoktsü, ta parnokisa shiogo.

Linük anüolentip tsütsü aliba Punggye-ri nungi dang North-i nuclear oset tendanga liasü saka Kim-i ashiba agibo par ‘nuclear force’ maparen ajak tembanger asünung joko ibaji menüngdaktsü.

Tan May ita 23-25 tsüngda sentong ka ayongzüka nuclear tendangba tesemji pokdoktsü, ta Pyongyang nungi foreign ministry ajanga ashiba olen ka official KCNA news agency ajanga sangdongogo.