North o South Korea nati jembitepba senden amener

South Korea kübok Paju nung tentetba yimjung yimtsüng, Panmunjom nung Inter-Korean Red Cross working level senden amenba jakdang S Korea’er tongti ketdangser, Lee Deok-haeng (Ajichilen nungi tanabuba) aser N Korea’er tongti ketdangser, Pak Yong Il (Abelen nungi tanabuba) nati teka amtepa ajurutepba noksa nung angur. (Paju, September 07)

 Seoul, September 07 (Agencies): North aser South Korea ketdangsertemi South Korea arrtsülen, Paju nung tentetba yimjung yimtsüng, Paju nung jembitepba senden ka tanü Hombar nü amenba osang jangjaogo.

Korean War tongpang raraba sülen küm 60 shi sadanga alitsüsa akümba nüburtem nem pei kibong züngsemtem den tanaben ajurutepdaktsütsü lenmang lapoktsütsü nükjidong nung linük ana nungi ketdangsertemi tan senden ya amentsü tenzüker lir.

Tanü senden nung linük ana nungi Red Cross ketdangsertemi kibong züngsemtem tanaben ajurutepdaktsütsü anogo latetsü onük benoka liasü.

N aser S Korea na nung alirtem atsü agi atsüdanga kidangsüa alir pei kibong züngsemtem den tesüsa 2014 küm February ita ajurutepba osang bushiteta lir.

Linük ana nung sadanga aliba kibong züngsemtem nem N Korea kübok Mount Kumgan nung taküm October ita ajurutepdaktsütsü moangka agütsütsü renemba osanga angazükogo.

Tesüiba mapang, 1950-53 tashi communist N Korea aser democractic S Korea na tsüngda tongpang kanga sashia raraba sülen linük ana nung sadanga aliba nüburtemi pei kibong züngsemtem den küm aika majurutepteti lir külen, 2000 küm ang inter-Korean senden amenba sülen mezüngsüa ajurutepa liasü.

Iba mapang nungi tenzüka, linük ana nung sadanga alirtem nem kümshi ken ajurutepdakja aru saka par linük ana tsüngda tesendaktep mejungi akümba yong iba maparenji tang nokdanga aliba osang bushitetogo.

S Korea nung alir nisung 66,000 shi pei kibongtem den ajuruteptsü shiti benokaka parnok rong nungi nisung noklang ishika dang shimteta pei kibong züngsemtem den ajurutepdaktsüba osanga bushiteta lir.

Sadanga aliba nüburtem nem pei kibong den ajurutepdaktsüba maparen mapang shia agitsü aser kasaji nisung timba nem maongka agütsütsü asoshi S Korea ketdangsertemi taoba mapang nungi onük benoka lir saka yamaji inyakba ajanga par linük nem timtem bener arutsütsü tsüboa N Korea-i iba onükji magizüki lir.

Korea linük ana tsüngda raraba tongpang yimjung tezüngzüktep ajanga masü saka meraratsü nangzüktepba ajanga anenba yong North nung alirtemi South-i motetba aser South nung alirtemia North-i moteti kanga timatemba osang bushiteta lir.