North o South Korea nati kibongtem tanaben ajurutepdaktsütsü lemteter

Seoul, September 08 (Agencies): North aser South Korea nati par linük ana nung küm 60 tejaklen nungi tenzüka sadanga aliba nüburtemi pei kibongtem den ajuruteptsü sentong tanaben tenzükshitsü telemtetba ka agiogo.

North aser South Korea na nungi tongti ketdangsertemi yashi Hombar nü S Korea arrtsülen, Paju nung tentetba yimjung yimtsüng Panmujom nung ajurutepa Inter-Korean Red Cross working level senden amenba sülen iba telemtetba ya agiba osang jangjaogo.

“North aser South Korea na nung sadanga alirtemi pei kibong züngsemtem den tanaben ajuruteptsü sentong taruba October ita 20-26 nü N Korea kübok Mount Kumgang resort nung agitsü sentong renemogo,” ta S Korea’er Unification Ministry-i tanü Mongolbar nü metetdaktsü.

Panmunjom yimjung yimtsüng nung yasüng aonung tashi senden amenba sülen sadanga alir nüburtemi pei kibong züngsemtem den ajuruteptsü sentong tanaben tenzükshitsü lemtetogo ta N Korea sorkaria osang jangjashitsü.

Tesüsa 2014 küm February ita agiba sülenbo iba sentong ya tan mezüngsüsa agitsü renemer lir aser iba sentong nung shilem agidaktsütsü asoshi linük shia nungi nüburtem noklang ka ka shimtettsü sentonga renemogo.

Communist yimsüsütsü yimya benshiba N Korea aser democracy yimsüsütsü yimya benshiba S Korea na tsüngda 1950-53 tongpang kanga sashia raraba sülen N Korea nung alirtemi S Korea nung alir pei kibong züngsemtem aser S Korea nung alirtemia N Korea nung alir pei kibong den majurutepteti aru.

Tesülen, 2000 küm otsüsütsüsa Inter-Korean Summit senden amenba sülen ang teshimtetba nüburtemi pei kibong züngsemtem den küm nung ken ajuruteptsü maongka ngua aruba osang jangjaogo.

Ajisüaka, par linük ana tsüngda tesendaktep mejungi akümba ajanga iba sentongji anendoker liasü.

Par linük ana tsüngda tongpanga raratsüsa tensa tamajung taoba August ita ajuruba sülen agiba meraratsü tenzüngzüktep den sentaktepa par linük anati sadanga aliba nüburtemi pei kibong züngsemtem den ajuruteptsü sentong ya tanaben tenzükshitsü renemer lir.