North o South Korea nati meraratsü nangzükteper

South Korea kübok Panmunjom nung ajurutepa meraratsü tezüngzüktep ka tanü Mongolbar nü agiba sülen South Korea Tir, Park Geun-hye’er security advisor, Kim Kwan-jim (Achijilen)-i North Korea’er tematiba mitkar ketdangser, Hwan Pyong So den teka amtepba noksa nung angur. (Panmunjom, August 25)

 Seoul, August 25 (Agencies): North Korea den meraratsü tezüngzüktep ka tanü Mongolbar nü agiba sülen South Korea-i yimjak nung ola tulu adokdakja N Korea anemba osangtsüsang mesangdongtsü renemogo.

Par linük ana tsüngda tongpang meraratsü nangzüktepba osangji S Korea’er national security advisor, Kim Kwan-jin-i tanü metetdaktsü.

“Seoul-i akhangba ama, Pyongyang-i tawa tensa mejungi kümdaktsüba atema taidok meshiba sülen ozü linük anati meraratepi yimjung nung alitsü nangzüktepogo,” ta pai ashi.

“Ozü linük ana tsüngda arrtsülen tentetba Demilitarized Zoen (DMZ) anülulentip tsütsülen landmine yutsüba ajanga S Korea mitkar züngsem ishika yirutsüba atema sasaba olen ka Pyongyang-i tanü metetdaktsüogo,” ta pai shisem.

Paisa ashiba agi, Pyongyang-i benokba ama, Seoul-ia Pyongyang anemba osangtsüsang yimjak nung ola tulu adoka sangdongba maparen anentsü asoshi nangzükogo.

“Tanaben inyaktsüsüa tatalokba kar matalokra, ozü Seoul-i ola tulu adokdaktsüba loudspeaker amshia Pyongyang anemba osangtsüsang yimjak nung sangdongba maparen anentsü renemogo,” ta pai nenshia ashi.

North aser South Korea nati taoba anogo 3 tejaklen nungi tenzüka jembitepba senden amenba sülen tanü meraratsü tezüngzüktep ya agir lir.

Iba tezüngzüktep agiba sülen par linük anapronglai tongpang raratsü renemshia par arrtsülen yutsüba mitkartem anitetadoktsü nangzüktepa lir.

DMZ anülulentip tsütsü densemba tesemtem nung Pyongyang-i yutsüba landmine apokba ajanga S Korea mitkar 2 tashi yirutsüba sülen par linük ana tsüngda tongpang raratsüsüa tensa kanga mejungi akümba osang bushitetogo.

N Korea-i yimjak nung taidok meshiba den külemi, tarutsü mapang nung tan amala tatalokba matalokdaktsütsü asoshi kümdangshitsü olen ka S Korea Tir, Park Geun-hye-ia metetdaktsüogo.