North o South Korea nati sentaktepshitsü senden amentsü renemer

Seoul, November 20 (Agencies): North aser South Korea sorkar nati sentaktepshitsü senden ka taruba hopta amentsü renemba osang ka Seoul-i tanü Hokolbar nü metetdaktsüogo.

Pyongyang nung tentba Committee for the Peaceful Reunification of the Korean Peninsula-i yashi, Brehostibar nü ayongba sülen par linük anati iba sentaktepshitsü senden ya taruba hopta amentsü renem.

“Tan ayongba senden ya Panmujom arrtsü yimtsüng nung tan November ita 26 nü amentsü renemogo,” ta shia, Pyongyang-i benokba senden amentsü onük agizükba osang ka Seoul’er Unification Ministry-i tanü osang jangjashitsü.

Par linük ana tsüngda tesendaktep tajungba akümtsü nükjidong nung temaba jenjang nung lenirtemi taküm August ita tongti tezüngzüktep kar agiba osanga jangjaogo.

Iba senden amenba sülen linük ana arrtsülen yutsüba landmine poka S Korea mitkar züngsem 2 tashi yirutsüba ajanga adokba mangatettepba ken o-a agiena liasü.

Kasa senden nung tematiba sorkar lenir jenjang nung senden amentsü nangzüktepba den külemi, tesüiba mapang, 1950s nungi tenzüka linük ana nung sadanga alir kibong züngsemtem tanaben ajurutepdaktsütsü sentong ayonga agishitsü renem.

Taküm August ita mezüngbuba senden amenba sülen par linük anati maneni senden amentsü asoshi Seoul-i onük aiben benok saka Pyongyang-i item onüktemji magizüki aru.

Par linük ana tsüngda tesüiba mapang raraba Korean War yimjung tezüngzüktep agiba ajanga masü saka meraratsü nangzüktep ajanga anenba yong North aser South Korea na tsüngda tanüa tesendaktep mejungi lir.