North o South Korea nati tensa tajungba kümdaktsütsü senden amener

South Korea Tir’er national security adviser, Kim Kwan-Jin (Achijilen) aser Unification Minister, Hong Yong-Pyo (Achijilen, tanabuba) nati North Korea’er tongti mitkar ketdangser, Hwang Pyong-So (Abelen) aser South Korea den sentakba maparen ketdang asüsang, Kim Yang-Gon (Abelen, tanabuba) na den Panmunjom yimtsüng nung senden amenba jakdang teka amtepa ajurutepba noksa nung angur. (Panmunjom, August 22)

Seoul, August 22 (Agencies): North o South Korea na tsüngda tang adokba mangatetepbaren agiena tensa tajungba kümdaktsütsü nükjidong nung linük ana nungi tongti ketdangsertemi par arrtsülen, Demilitarised Zone (DMZ) nung tentetba Panmunjom yimtsüng nung ajurutepa senden ka tanü Honibar nü menogo.
S Korea Tir, Park Geun-hye’er national security advisor, Kim Kyou-hyun aser lar unification minister nati N Korea lenisang, Kim Jong-Un’er temaba mitkar shisatsü agütsüsang, Hwang Pyong So aser S Korea den sentakba maparen ketdang asüba tongti ketdangser ka den tanü ajurutepa ghonda tesadang ka shi agia sendenji amenba osang jangjaogo.
Tan Brehostibar nütu par mitkartemi arrtsü adena injang tesashi yoka raratepba sülen Korean peninsula nung tang tongpanga raratsüsa tensa kangasa mejungi kümogo.
Ajisüaka, Korea linük anapronglai tongpang merarai par mangtettepbaren ajunga senden mena jembitepba ajanga bentettsü asoshi United Nations, United States aser N Korea pusemba linük kija, China nungeri ajungshitsü tenzüka lir.
“Pyongyang-i yimjung senden ka amentsü asoshi yashi Hokolbar nü onük benokba sülen ozü Seoul-ia iba onükji agizük saka iba senden nung Hwang-i shilem agitsü takhangba olen ka tanü Honibar nü metetdaktsü,” ta Kim-i tesülen metetdaktsü.
Ajisüaka, tanü senden nung shilem agirtemi kechi telemtetba agi iba osangbo tang tashi alima dang metetdakja mali.
North aser South Korea na tsüngda 1950-53 tashi raraba Korean War yimjung tezüngzüktep agiba ajanga masü saka merarteptsü nangzüktepba ajanga anenba yong par linük ana tsüngda tan amala mangatettepbaren mapang shia adoka tongpang raratsüsa tensa mejungi akümba osang bushiteta lir.