Northeast ajanga southeast Asia den sentakteptettsü:VK Singh

New Delhi, July 08 (Agencies) : External Affairs Minister V.K. Singh-i, Northeast India tesem ajanga South East Asia den sentakteptettsü lenmang peria ngutettsü, ta Hokolbarnü kanga temulung lema metetdaktsü.
“India foreign policy aser kidanger linüktem den tesentaktep tajung ayuba agi tarutsü nung northeast tesemtem ajangzüktsü kechiba süra item kidanger linüktem ya state ka mesüra ana denbosa arr sür alir,” ta Lok Sabha Secretariat nung Secretary, IAS, Dr D. Bhalla-i züluba “Strategic Significance of North East India” kaket sayatsüba mapang Singh-i ashi.
Indian Army Eastern Command tekolaksang aser northeast tesem reprangsang Singh ano army nung tekolakba makümdang pai, Northeastern state tem ya kidanger linüktem ama renloka aotsü maongka jenti lir, ta shia liasü.
Sorkari ‘Look East Policy’ inyakyim lapoktsüba aser tang Ato Kilonser Narendra Modi-i aniba Union sorkar inyakyim balala ajanga iba tesem ya South East Asia tesemtem den sentakteptsü asoshi lenmang aisü nung amshitsü, ta Singh-i ashi.
Singh ya 2014 November ita tashi Modi sorkar kübok Ministry of Development of North Eastern Region (DONER) nunga minister ka ama inyaka liasü.
Kaket zülusang Dr D. Bhalla ya Indian Administrative Service officer nung 1986 batch lir. Pa ya Lok Sabha Secretariat nung May, 2015 nungi inyaker. Ibaji masüdang pa Food Corporation of India (FCI) nung Executive Director inyaka liasü.
Pai tang züluba kaket nung yimsüsübaren nung mepetmesü aliba aser northeastern nung terenlok maliba den telungpur tebilemtsütem zülusema lir.
Eight Sisters of the Northeast ta ajaba — Arunachal Pradesh, Assam, Manipur, Meghalaya, Mizoram, Nagaland, Sikkim aser Tripura state tem nem jenjang balaka agüja lir.
Bhalla-i Nagaland aser centre nung mapang talangka sorkar tenzükogo. Pai northeast tesemtem sobaliba aser rongsenkettsüng tsütsü kanga junga metetjema lir.