Northeast CM temi Act East Policy züngzünga inyakdaktsünür

New Delhi, Monupii (May) 4 (Agencies): North east state tem nungi Chief Minister temi tanü pei pei state renloktsü indang onüktem lemsatep.
Chief minister temisa Act East Policy züngzünga inyaktsü atema ayongzüka jembidang iba policy ajanga Asia-Pacific linüktem den shishilembaren aser sobaliba tsütsü tesentaktep tajungba akümtsü ta ashi.
New Delhi nung External Affairs Minister Sushma Swaraj menden ser amenba senden nung Northeast State ti nungi Chief Minister tem aden.
Meghalaya Chief Minister Conrad K. Sangma-i jembidang, Act East Policy mapa küma inyakba nung tayongzükba aika lir aser iba policy tejakleni anir aotsü atema North east state tem aser Centre amalitepa inyaktsüla, ta ashi.
“North East ya tesem ka ama dang züngshir saka policy temji state ajak denbo meputeptsü. Anungji iba atema jungjunga inyaktsüla aser ibaji state level consultation aser state tem tsüngda asüngdangyatepba ajanga dang akoktsü” ta Conrad-isa ashi.
Paisa Centre sorkar dang North East nung gari lenmang tajungba kümdaktsütsü atema ayongzükdang, state tiprongla nung aser ano kidanger linüktem den four-lane route alitsüla ta ashi.
“Northeast nung road aser air connectivity tajungba kümra, shishilembaba talila akümtsü aser iba ajanga rongsenkettsüng jenjang renloktsü” ta Conrad-isa shisem.
North Eastern State tem kati ka angatetteptsü atema Centre-i iba ama sendentem Regional aser State level nung ayonga amentsü ayogzüker. Ibala sendentem ajanga Act East Policy jungjunga inyaktsü atema sentongtem atongtettsü, ta Meghalaya chief minister-isa metetdaktsü.
Senden nung Arunachal Pradesh, Nagaland, Assam, Manipur aser Tripura nungi chief minister temia o jembi.
Sensaksem alidang Vice Chairman, Niti Aayog Dr Rajiv Kumar, Minister of State for External Affairs Gen (Dr) VK Singh (Retd), Foreign Secretary, Secretary (East) from the Ministry of External Affairs aser Ministry of DoNER, Tourism o North Eastern Council nungi Secretary temia shilem agi.