Northeast-i Arrla 371 atema metsübutsüla: DoNER Minister

Guwahati, August 9 (Agencies): Arrla 370 agienba ama Northeast nungi Arrla 371 magientsü ta Union Minister Jitendra Singh-i tanü ashi.
Shillong nung e-Governance indang 22 buba National Conference tenzükba sentong nung jembidang Union Minister of State (Independent Charge) for the Ministry of Development of North Eastern Region Jitendra-i iba osang metetdaktsü.
Northeast nung alirtemi tsübua mebilemtsüla kechiyong Arrla 370 aser 371 ya balala lir, ta paisa shisem.
August 6, 2019 nü Union Home Minister Amit Shah-i “Modi-i aniba sorkari Indian Constitution nung Arrla 371 agientsü tebilemba kecha mali” ta metetdaktsüogo.
“Narendra Modi’er sorkari Arrla 371 agientsü tebilemba kecha mali ta ni Northeast state tem dang nangzüker” ta Lok Sabha nung Arrla 370 atema o atsütepdang Amit Shah-i ashi.
Congress MP Shashi Tharoor-i iba onük benokdang pai iba telangzüba agütsü.
Jammu & Kashmir nem jenjang balaka agütsüba Arrla 370 agienba sülen Northeast nung alirtem kechi ataloktsü ta asüba tasüngdangbatem agi sünga lir, kechiyong Northeast state teimba ka Arrla 371 kübok temeten balala agüja lir.