Northeast nung alirtem maitsü aibelena angateter : Rijiju

Imphal, April 2 (Agencies) : Northeast nung aliba nübortem indang maitsü chichiba taileni meyipzüka angateter aser NE tesem tobur ajunga miimbanga dang lir, ta Union minister of state for Home Affairs, Kiren Rijiju-i Deobarnü ashi.
“Tangari kü dang Northeast semdangtsü atema tensa junga lir mali, lendong keta lir mali? ta asüngdangdang ni kanga jashir” ta Rijiju-i ashi.
Paisa ashiba agi, nübortemi bomb apokba lendong aser tanga tashiyim mapatem tsübur.
“Mashileni anisaba lanurtem linük yangerba wadang nung shilem agitsü atema anir arutsü mapa inyakdar,” ta Rijiju-i Imphal nung ayongzüka agiba Digi Mela nung o jembidang ashi.
Iba sentong nung Manipur Chief Minister, N. Biren Singh-ia o jembidang, yimtsüng tia nung aliba tesem ajak nung internet connectivity agütsütsü aser bank temi item tesemtem nung kongsangtem lapoktsü atema metetdaktsü.
“Manipur nung Cancer agi nisung taküm aika samatsür. Anungji, Centre-i J.N. Institute of Medical Science nung yipden 100 aliba cancer ward ka lapoktsü temelaba agütsüogo” ta chief minister-isa ashi.
Paisa, “Centre sorkari hill district tem nung marketing complex yanglutsü atema sen crore 150 lemzüktsüogo aser ibala terenlok maparen ajanga nisungtem tali longjemdaktsütsü” ta shisem.
Imphal nung aliba Khuman Lampak sports complex nunga floodlights enoktsü, ta Biren Singh-isa metetdaktsü.