Northeast nung Arrla 371 agientsü tebilemba mali: Amit Shah

Itanagar, Tsüklai/Feb. 20 : Itanagar nung Brehostibarnü Arunachal Pradesh 34 buba Statehood Day amungdang Union Home Minister, Amit Shah nem sempet agütsüba noksa nung angur.

Itanagar (Arunachal Pradesh), February 20 (Agencies): India sorkari Northeast sobaliba wazüka ayutsü atema inyaktsü, ta shia Brihostibarnü Union Home Minister, Amit Shah-i, Arrla 370 agienba sülen Northeast nunga Arrla 371 agientsü ta osang tai proka liasü, ta metetdaktsü.
Brihostibarnü Arunachal Pradesh yimtiba, Itanagar nung sentong ka nung jembidang pai iba o ya jembia liasü.
India linük temzüng nung Arrla 371 ajanga maongka balaka agütsüba state timbaka Northeast nung lir; iba Arrla kübok ozüngtemji sobaliba aser customary ozüngtem wazüka ayutsü asoshi lir.
Arunachal Pradesh state jenjang ngur küm 34 ajungba anogomong sentong nung jembidang Amit Shah-i, 2014 küm Narendra Modi Ato kilonser makümba mapang tashi nungbo Northeast ya tanüngba India den litsü ajangadang sendaktepa liasü saka tangbo Modi sorkar kübok northeast ya tanüngba India den atangji nunga sendaktepogo, ta ashi.
Shah-i, “Jammu & Kashmir nem maongka balaka agütsüba Arrla 370 agienba sülen osang tai proka- Arrla 371-a agientsü ta jembi. Iba ya kodanga mataloktsü. Shingaia ibaji bilema mali,” ta metetdaktsü.
Northeast nung telungpur tebilemtsü aser state tsüngda arrtsü mangatettep ken otem dak sendakba nung Home Minister-i, Modi sorkari iba atemaji inyaktsü, ta metetdaktsü.
“2024 küm onoki nenok votes yima arudang Northeast nung telungpur tebilemtsü aser state tsüngda mangatettep ken o tebilemtsü kecha malitsü,” ta paisa metetdaktsü.