Northeast nung Easter Sunday kanga longsoa amung

Itanagar/Kohima/Shillong, April 16 (Agencies): Yisu Khrista-i alima alangzüktsü atema tasü nungi shia aruba tamaitsü atema amungba Easter Sunday tanü northeast nung kanga longsoa mungogo.
Northeast kübok Mizoram, Nagaland, Meghalaya aser Manipur nung Khristan million 5.3 shi lir aser tanüngba Tripura, Assam, Arunachal Pradesh aser Sikkim state tem nunga Khristan tamanger aika lir.
Mizoram nung tanü Salvation Army indang band party telok balalai “Pa shia aruogo” ta asüba ken tema yimdong sema senzü.
Mizoram nung lanurtemi pei pei arogotem nung sunrise service ayongzüka agi aser ano Good Friday nungi parnoki lumiba sentong tembanga arogopurtemi sarasadem aser tekülem sentong balala ayongzüka agi.
Mizoram Angh, Lt. Gen. Nirbhay Sharma aser Chief Minister Lal Thanhawla nati nübortem den Easter salem lemsatep.
Nagaland yimtiba nunga nisung meyirjang aika World War II cemetery nung adenshia Easter sunrise service nung aden.
Nagaland nung tamangertemi sentong balala ayongzüka aser aser Lord’s Supper o thanksgiving feast nung shilem agi.
Nagaland Angh, P.B. Acharya aser Chief Minister Shurhozelie Liezietsu natia Easter salem osang metetdakja liasü.
Deobarnü Meghalaya nunga Khristantemi kinü tanurtem tzüsenba, shimo milen amer yimdong sema senzüba aser Easter entsü o amtsük amshia Easter mungogo.
Khristantem teimba sür aliba state nung arogo balala nung sentong tululu ayongzüka agi aser Archbishop of Shillong Dominic Jala-i St. Dominic Church, Mawlai Parish nung Easter sentong len ania agi.
Meghalaya Angh, Banwarilal Purohit-i sangdong ka nung, Easter ji teimla indang benjung ka lir aser alima nung nisung million aika bendanga agütsüba aser tatok agütsüba benjung ajanga ajungmesor, ta ashi.
Chief Minister, Mukul Sangma aser National People’s Party President, Conrad K. Sangma natia Easter Sunday tenüng nung salem osang metetdaktsü.
Meghalaya nung nütsüng yongsük nung shilem 75 shi ka Khristantem lir.