Northeast nung encephalitis agi atonger Assam nung timba lir

Guwahati, February 26 (Agencies): Assam nung 2010 nungi 2016 tashi nung Japanese encephalitis (JE) agi atonger nisung 3,391 aliba state-i metetdaktsü, koba northeast state tem rongnung timba lir.
Maneni kasa kümtem nung JE agi nisung 779 asü, koba ano northeast tesemtem rongnung timtiba liasü, ta osang ajangasa shisem.
Taoba sorkar mapang nunga, 2012 aser 2014 na tsüngda nung iba tashidak nokdangtsü asoshi vaccination sentong amala inyaka liasü.
2010 aser 2016 tsüngda Manipur nung JE agi atongba nisung 108 putetba aser 6 asüba osang agütsü. Nagaland nung nisung 41 dak iba tashidak agi atong aser nisung 5 asü, Meghalaya nung nisung 150 nungi 15 asü, Tripura nung nisung 152 nungi 5 asü aser Arunachal nung nisung 64 dak iba tashidak putet aser parnok 5 asüba osang lir.
2010 küm Assam nung JE agi shirangba parnok 142 liasü, aser parnok rongnungi par 40 asü.Taruba küm iba tashidak menar parnok 489 tashi aküm aser parnok rongnungi par 113 asü. 2012 nung JE tashidak agi adonger parnok 463 aser tasür 100 liasü. Tashidak agi atonger tera agi tajemba kümaka tasüba kasa shi dang liasü. 2014 nung JE agi shiranger parnok 761 liasü aser item rongnungi par 165 asü.
Iba kasa tasüba aser shirangba maneni ataloka, 2015 nunga JE agi shiranger parnok 614 aser 135 asüba osang metetdaktsü. Yaküm shiranger 427 aser tasür 92 ta liasü.
State health department-i district 4 kong JE aser AES tashidak bolua ali, item tesemtem nung küm 15 nung 65 tashi nung aliba nübortem nem vaccine March tanabuba hopta tashi nung agütsütsü asoshi sentong yangludar. Iba sentong February tanabuba hopta tashi nung agitsü asoshi renemer liasü.
“Northeast nung tanga state dang nungi Assam nung JE agi shiranger timba alibaji shidak lir. Iba ya state litsü aser aluyimba bulua aliba ajanga lir. State ajunga nung tzülu aika prokshia lir,” ta National Vector Borne Disease Control Programme (NVBDCP) atema state ketdangser kati ashi.