Northeast nung mezüngbuba Express Highway yanglutsü

Guwahati, April 5 (Agencies): Northeast nung mezüngbuba express highway project Assam nung sen crore 40,000 endoka yanglutsü, ta Union Road Minister Nitin Gadkari-i ashi.
“Onoki Northeast atema tongti süa bilemer. Onoki Assam kübok Brahmaputra ayongküm anasa North East nung mezüngbuba express highway yanglutsü. Kilometre 1,300 express highway yangluba nung sen crore 40,000 shi endoktsü ama asadangteter” ta Gadkari-i ashi.
Guwahati nung ‘Namami Brahmaputra’ benjung tembangba sentong nung o jembidang, Gadkari-i Assam Chief Minister dang iba lenmang atema ali dak sendakba maparen inyaktsü mepishia metetdaktsü.
“Ali dak sendakba maparenji state sorkari inyaktsüla. Brahmaputra tzüküm nung tutetba lisemji lenmang yangluba nung amshitsü” ta paisa shisem.
Bangladesh nung aliba Chittagong port tashi rongtem tetsükdaktsü melii senzütettsü atema Centre-i Upper Assam kübok Sadia nungi Brahmaputra ayongküm tutoktsü.
Brahmaputra ayongküm tutoktsü aser express highway yanglutsü atema Union Road Minister Nitin Gadkari matsüngdang Assam sorkar, National Highways Authority of India (NHAI) aser Inland Waterways of India tsüngda tenangzüktep ka agiogo.