Northeast nung railway lenmang yangluba mapa nung engineer tem tetsükdaktsü ajurur

Agartala, April 04 (Agencies): Northeast nung aliba tenemtem nung railway lenmang yanglutsü asoshi lisa majungba aser tsüngsang mopung majungba ajanga tetsükdaktsü jenti ajurur, ta Northeast Frontier Railway (NFR) ketdangsertemi ashir.
“Northeast nung tzüngluruwa ya June nungi September ita tashi dang süaka March nungi October ita tatem tashi tzünglu aruba ajanga item tesemtem nung mapa inyaktsü asoshi küm ka nung ita pezü nungi pongu tashi dang adoker,” ta Commissioner of Railway Safety (CRS), Shailesh Kumar Pathak-i ashi.
“Himalaya region aser tongtibangsa Northeast state tem ya tenem aser anentsüh kanga bolua alur, anungji iba amala lendong nungi kümzüktsü asoshi asameyang talila agitsüsa akümer. Iba den külemi mapa inyaktsü asoshi mapang peria maliba ajanga railway engineer aser iba mapa inyakertem asoshi tetsükdaktsü jenti ajurur,” ta Pathak-i osangbener dang ashi.
“India state balala nung ‘single-line track’ kilometre ka inokba nung sen crore 7 aser ‘double line track’ kilometre ka inokba nung sen crore 10 aoer. Saka Northeast tesemtem nung lisa majungba aser danga kulitem ajanga kasa lenmang yangluba nung sen timba aoer,” ta paisa ashi.
South Tripura nung aliba Sabroom aser Agaratla sendakteptsü asoshi kilometre 114 lenmang yangluba nung Udaipur-Garjee section nung kilometre 9.26 nung train jajatsü lenmang tasen yangluba semdangtsü asoshi CRS ya Tripura-i aru.
Southern Bangladesh nung aliba Chittagong nung rongtem anenba tesem aser Sabroom tsüngda kilometre 75 lir aser iba train lenmang ya sen crore 1,150 indoka yanglutsü aser 2019 küm renemtsü.
“Northeast tesemtem nung train lenmang yangluba mapang ayong tila aika ajurur aser item tesemtem nung apu tila, tulu aser longpok aika yanglutsüsa akümer,” ta NFR indang engineer kati ashi.
“Kilometre 111 indang train lenmang Jiribam-Tupul-Imphal line nunga India nung longpok talangtiba kilometre 11.55 yangludagi. Iba longpok ya Jammu & Kashmir nung aliba Banihal-Qazigund line nung longpok kilometre 11.2 aliba dang nungi talangba lir,” ta NFR indang engineer-isa shisem.
“Northeast state yimtiba 8 prongla train agi 2020 tashi nung sendakteptsü nükla lir,” ta Minister of State for Railway, Rajen Gohain-ia shia lir.
2008 October nung Assam ajanga ‘metre gauge track’ Agartala tashi yanglua aoba ajanga India nüjiso ngur Northeast state tem nung mezüng train agi atongba yimtiji Agartala lir.
Iba sülen ‘metre gauge’ ya ‘board gauge’-i melen. Assam yimtiba Guwahati ya India nunger nüjiso mangudang nungi train lenmang liasü aser tangbo Imphal-a rail map nung inokogo.
“NFR-i ‘metre gauge railway’ lenmangtem ya ‘broad gauge’-i melenogo. Northeast nung ‘metre gauge’ lenmang ya akhi otsü kümogo,” ta Gohain-i ashi.
Tesüsaba kilometre 30 indang ‘metre gauge section’ ya southern Assam nung aliba Karimganj district kübok Baraigram-Dullabcherra ya liasü, saka iba lenmang ya ‘board gauge’ lenmangi melenogo aser Hokolbarnü nungi tenzüka iba lenmang nung nisung amenba train tem senzü tenzükogo.