Northeast nung senotsü inyakyim 90:10 asütsü

Agartala, November 11 (Agencies): Centrally Sponsored Schemes (CSS) atema NDA sorkari northeast state tem nem senotsü agütsüba inyakyimji mezüng amasa asütsü mulungogo, ta tanü Agartala nung sorkar ketdangser kati ashi.
Congress, Left aser Regional party temi yimsü asüba northeast state ti nungi chief minister tem-i pangzüng ka lateta Ato kilonser, Narendra Modi dang, item state atema maongka balala maneni agütsütsü tamalen mepishia liasü.
NE state tem atema maongka balaka inyakyimji ratio 90:10 asütsü, iba nung ya sen teintokba ajunga nungi shilem 90 Centre sorkari agütsütsü aser tanüngba shilem 10 ji pei pei state temi inoktsü.
Maongka balaka nung ya state 11 densema lir- NE nungi state 8 den Himachal Pradesh, Jammu & Kashmir aser Uttarakhand state tem lir.
North Eastern Council (NEC) nungi ketdangser kati osangbenertem dang, “Union Minister of State for Finance, Jayant Sinha-i, Northeast state tem nung tongtibang CSS (Centrally Sponsored Schemes) 17 atema 90:10 ratio inyakyimji maneni benoktsü Centre sorkari lemtetogo aser kanga tongtibang masüba CSS scheme tem atema 80:20 ratio inyakyim asütsü ta shiogo,” ta metetdaktsü.