Northeast nung totzü belenba aser ayokba nung timtem adoktsü

Guwahati, July 26 (Agencies): Northeastern tesemtem nung Assam Petroleum Mazdoor Union (APMU)-i mapang telatetka makai longkak aitsüba sangdongogo aser iba ajanga northeast nung Brehostibarnü nungi totzü belena ayokba nung timtem ajangshitsü akok. APMU ajanga ashiba agi, iba longkak aitba sentong ya takhangba aika dak ajemdaker ayongzük, koba nung ita shia itasen tajemtiba agi sen 14,500 agütsütsüba, Provident Fund aser Employees’ State Insurance Corporation benefits tem densema lir.
Union ajanga ashiba agi, petroleum depot nung inyakertem aser oil tanker crew parnok lakh ka dak tali-i iba sentong nung shilem agitsü.
Osangbenertem den jembidang APMU tir Munin Mahanta-i ashiba agi, parnok akhangba tem petroleum company temi sendoka toktsüba ajanga iba jenjang ya agitsüsa aküm. “Onoki tezüluba nung onok takhangbatem petroleum company tem nem yaküm October 21 nü agütsüogo. Iba sülen petroleum company tem nungi ketdangsertem aser onok na tsüngda Labour Commissioner matsüngdang taküm March 12 nü senden ka kaogo. Iba senden nung petroleum company tem nungi ketdangsertemi onok takhangba asadanga April 15 nungi mapa küma inyak tenzüktsü ta nangzük. Ajisüaka tanga tashi nung tenangzükbatem kecha ataloka mali aser iba ajanga onoki iba sentong ayongzüktsüsa aküm,” ta Mahanta-i rasaa ashi.
Mapang telatetka makai longkak aitba sülena petroleum company temi onok takhangba mataloktsüra onoki asendenshir iba longkaka aitba tali akangshitsü, ta pai amokmeren.
Ajisüaka tetenzüknungbo LPG belenbabo mekongshitsü, saka tatsüka lir LPG sector nung inyakertema iba longkak aitba sentong nung adentsü imlar.
Northeast tesem ajunga senteper petrol depot 1,207, LPG agencies 903 aser kerosene depot 485 lir. Iba den külemi oil tankers 10,000, LPG cylinder abenba tata gari 1,600 aser tube 1,800 (gas abenba tanker) lir. LPG sector nung inyakertem dak alaker petrol aser kerosene depot nung inyakertem den külemi oil tanker nung inyakertem ajak iba longkak aitba sentong nung shilem agitsü.
LPG agencies (817) dak alaka petroleum (845) aser kerosene depots (485) Indian Oil Corporation Ltd meyong lir. Tanga company tem rongnung Bharat Petroleum Corporation Limited (petroleum depot 216 aser LPG agencie 68), Hindustan Petroleum Corporation Ltd (petroleum depot 120 aser LPG agencie 28), Essar (petroleum depot 10) aser Reliance (petroleum depot 16) densema lir.