Northeast nung tzümetsüng timtem tulu lir

Agartala/Guwahati, August 23 (TYO) : India kübok northeast tesem nung Arunachal Pradesh aser Assam state tem nung tzümetsüng timtem mejungi lir.
Osang angazükba agi, Arunachal Pradesh kübok district ana Lohit aser Namsai nung Lohit, Noa-Dehing, Kamlang aser tanga ayongtem nung tzü talila ayimer.
Item tesem nung tsünüsenbongtsü, lenmang aser communication infrastructure nungertem raksaogo ta osang angazüker.
Lohit district nung Alubari aser Tezu tsüngda tongtepratep raksaogo aser Mahadevpur, Piyong, Lathao, Chongkham o Wakro circle tem tzü agi metsüngbanga lir ta All India Radio ajanga ashi.
Ano, Assam nunga gari lenmang 90, tzü noktangbatem, aputem aika tzümetsüng ajanga raksatsüogo ta Assam Disaster Management Authority-i metetdaktsü.
Kokrajhar, Bongaigaon aser Barpeta district tem nung takoksa timba ajuruogo ta ADMA-isa metetdaktsü.