Northeast nungi nisung ana nem Honoris Causa degree agutsü

Dimapur/Mangaluru, Mongputeni/October 26 (TYO): Arunachal Pradesh nung Er Latsam Khimun aser Assam nungi Ramkui Jeme nati Northeast nung mapang talangka nungi loktiliba tenzüka aruba atema Nitte University, Mangaluru-i tena nem Honoris Causa (Honorary Doctorate Degree) agutsüogo, ta tanü PRO to Governor sangdong ka ajanga metetdaktsü.
Tanü Mangaluru nung University auditorium nung sentong ka ayongzüka Nitte University Chancellor, N Vinay Hegde-i tena nem iba Degree agutsü.
Kasa sentong nung tongti tesemdangerji Nagaland Angh, PB Acharya liasü.
Angh, Acharya-i Er Latsam Khimun aser Ramkui Jeme nati North East nung loktiliba tenzükba mapa tajungtem meteta lir, ibayongji pai tena nüng benoka liasü.
Angh-i, lenla balala nung loktiliba aser linük tenzükba mapa tajungtemji Universities-i züngshia tetushi agutsütsüla, ta ashi.
Angh-isa, item ama tetushi agütsüba ajanga tangara ajungmesotsü, ta ashi.
Angh, Acharya-i ashiba agi, academic dak alia social activist temi ola madoki tongtibang mapa tajung inyakba atema tetushi agutsübaji South India nung tang mezüng Nitte University asutsü.