Northeast state 3 nung nashi tepsetba menokdangtsü : BJP

New Delhi, March 27 (Agencies) : Sangküm assembly elections agitsü aliba Northeast state asem nung BJP tashi arura nashi tepsetba atema tenokdangba magütsütsü ta Bharatiya Janata Party (BJP)-i Hombarnü metetdaktsüogo.
“Sangküm onoki sorkar akümtsü tashi ngura, UP nung ama Nagaland nungbo nashi tepsetba menokdangtsü. Nagaland nungbo tensa khenyongi balaka aser ozü central lennirtemi ibaji meteta lir” ta Nagaland BJP tir Visasolie Lhoungu-i osangbener dang ashi.
Ano külen, BJP Meghalaya unit general secretary, David Kharsati-ia sangdong ka nung, pei ajangzüktsü asoshi bilema inyakba telok kari olulutem prokshir, ta metetdaktsüogo.
“Uttar Pradesh nunga license shitak maliba shi alepba tesemtem ang merenshir. Nashi tepsetba menokdangtsü, saka shiruru tepsetba aser ayokba maparenji timi inyaktsü atema sorkar nem mapa inyakdaktsünür” ta Meghalaya BJP tir, Shibun Lyngdoh-ia ashi.
“BJP-i terenlok atema alizüng yur mapa inyakba ngua onok iba party nung züngsem aküm. Party indang jenjang tajungba akümer aser nisung aika züngsema arudar. Sangküm elections nung onoki takok angutsü imlar” ta Visasolie Lhoungu-isa osangbener dang ashi.
Mizoram BJP tir, JV Hluna-ia “Mizoram aser north east nung aliba tanga state nunga nashi tepsetba menokdangtsü, kechiyong iba tesem nung Khristan tamanger teimba lir” ta ashi.
Meghalaya, Mizoram aser Nagaland state tem nung Khristan tamangertem teimba lir aser parnoki nashishi kanga sapur.
Hombarnü Commerce Minister, Nirmala Sitharaman-i ashiba agi, “Uttar Pradesh nung ozüngi memelaba shi alepdak dang nokdanger aser itemji shibangtsüba atema tanga onük madoktsüla”.
“Uttar Pradesh nung ozüng alema lapokba shi alepba tesemtem shibangtsür. Chief Minister Adityanath Yogi-ia ibaji jangjajangja metetdaktsüogo, anungji iba inyakyim atema tebilemba tanga mebenoktsüla” ta tanü Parliament nung Sitharaman-i ashi.